ភ្នំពេញ៖លោកឧត្តមសេនីយ៍ទោហង្សវណ្ណៈនៅក្រសួងមហាផ្ទៃត្រូវបានកម្លាំងនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញឃាត់ខ្លួនបញ្ជូនមកតុលាការនៅថ្ងៃទី២១ខែមិថុនាឆ្នាំ២០២១នេះពាក់ព័ន្ធបទល្មើសឆបោកប្រាក់ជាង២ម៉ឺនដុល្លាររត់ការចូលក្របខ័ណ្ឌមន្ត្រីនគរបាលជាតិតែមិនបានសម្រេច។
លោកឧត្តមសេនីយ៍ទោហង្សវណ្ណៈបច្ចុប្បន្នរស់នៅភូមិព្រែកសំរោង៣សង្កាត់តាខ្មៅក្រុងតាខ្មៅខេត្តកណ្ដាល។
តាមប្រភពព័ត៌មានដែលទទួលបានគឺលោកហង្សវណ្ណៈត្រូវបានចាប់ខ្លួនតាមដីកាបង្គាប់អោយចាប់ខ្លួនរបស់លោកម៉ៅស៊ីណាចៅក្រមស៊ើបសួរសាលាដំបូងរាជធានីភ្នំពេញ។
លោកហង្សវណ្ណៈជាប់ចោទពីបទ«ឆបោក» ប្រព្រឹត្តនៅចំណុចស្ថានីយ៍ប្រេងឥន្ទនៈសូគីមិចសង្កាត់ទន្លេបាសាក់ខណ្ឌចំការមនកាលពីថ្ងៃទី២ខែកញ្ញាឆ្នាំ២០១៦តាមមាត្រា៣៧៧និងមាត្រា៣៧៨នៃក្រមព្រហ្មទណ្ឌ។
លោកឧត្តមសេនីយ៍ទោហង្សវណ្ណៈបានរងនូវពាក្យបណ្តឹងរបស់ប្រជាពលរដ្ឋម្នាក់ដែលប្តឹងចោទប្រកាន់ថាបានយកលុយគេចំនួន២២,០០០ដុល្លារមេរិកទៅរត់ការចូលបម្រើការងារជាមន្ត្រីនគរបាលជាតិប៉ុន្តែមិនបានសម្រេចតាមការសន្យាពោលគឺស៊ីដាច់ប្រាក់ទាំងនេះនិងថែមទាំងគេចវេសមិនជួយដោះស្រាយជាមួយម្ចាស់ប្រាក់ទៀតផងទើបគេប្ដឹងមកតុលាការតែម្តង៕
