(ត្បូងឃ្មុំ)៖នៅព្រឹកថ្ងៃទី៣ ខែកក្កដា ឆ្នាំ២០២១ ឯកឧត្ដមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំបានទទួលជួបស្វាគមន៍សំណេះសំណាលជាមួយឯកឧត្តមសាស្រ្តាចារ្យម៉មប៊ុនហេងរដ្ឋមន្រ្តីក្រសួងសុខាភិបាល នៅសាលាខេត្តត្បូងឃ្មុំ។
ឯកឧត្ដមបណ្ឌិត ជាម ច័ន្ទសោភ័ណ បានថ្លែងអំណរគុណយ៉ាងជ្រាលជ្រៅដល់ក្រសួងសុខាភិបាលពិសេសឯកឧត្តមរដ្ឋមន្ត្រីម៉មប៊ុនហេងដែលតែងតែជួយគាំទ្រទាំងធនធានមនុស្ស សម្ភារៈ បច្ចេកទេសក្នុងយុទ្ធនាការប្រឆាំងទៅនឹងជម្ងឺកូវីដ–១៩។
ក្នុងជំនួបពិភាក្សានោះដែរ ឯកឧត្តមបណ្ឌិតអភិបាលខេត្ត ក៍បានស្នេីសុំរថយន្តសង្គ្រោះបន្ទាប់បន្ថែម និងទីតាំងរៀបចំជាមណ្ឌលពិនិត្យព្យាបាលអ្នកជម្ងឺបន្ថែមទៀត ខណៈដែលរកឃេីញអ្នកវិជ្ជមានកូវីដជារៀងរាល់ថ្ងៃ។
មានប្រសាសន៍នាឳកាសនោះឯកឧត្តមរដ្ឋមន្ត្រី ម៉មប៊ុនហេងបានកោតសរសើរវាយតម្លៃខ្ពស់ចំពោះចំណាត់ការរបស់អាជ្ញាធរខេត្តត្បូងឃ្មុំ ដែលមានឯកឧត្តមបណ្ឌិតអភិបាលខេត្តបានដាក់ចេញនូវរាល់វិធានការបន្ទាន់នានាជាពិសេសដែលមានមន្ទីរសុខាភិបាលខេត្តជាសេនាធិការដ៏ល្អក្នុងកិច្ចការងារប្រយុទ្ធប្រឆាំងទៅនឹងការឆ្លងរីករាលដាលជម្ងឺកូវីដ–១៩នេះ។
ចប់ប្រសាសន៍សំណេះសំណាលឯកឧត្តមរដ្ឋមន្ត្រីបានបន្តចុះទៅពិនិត្យមណ្ឌលចាក់វ៉ាក់សាំងនៅមន្ទីរបង្អែកនរោត្តម ព្រះសីហនុត្បូងឃ្មុំ។
បន្ទាប់មកទៀតឯកឧត្តមសាស្រ្តាចារ្យម៉មប៊ុនហេងរដ្ឋមន្រ្តីក្រសួងសុខាភិបាល ក៍បានបន្តអញ្ជើញចុះពិនិត្យការសាងសង់អគារមន្ទីរពេទ្យមិត្តភាពកម្ពុជា–ចិន ត្បូងឃ្មុំ ដែលបច្ចុប្បន្នក្រុមជាងកំពុងសាងសង់សម្រេចបានប្រមាណ៧០%ហេីយផងដែរ។
ឆ្លៀតក្នុងឳកាសនោះឯកឧត្ដមរដ្ឋមន្ត្រី បានជម្រុញដល់មន្ត្រីសុខាភិបាលបន្តខិតខំប្រឹងប្រែងបន្ថែមទៀត ការងារប្រយុទ្ធប្រឆាំងនឹងការរីករាលដាល ពោលគឺក្រុមគ្រូពេទ្យជួរមុខកំពុងមានតួនាទីយ៉ាងសំខាន់ក្នុងការទប់ស្កាត់ និងចូលរួមផ្តល់វ៉ាក់សាំងរបស់រាជដ្ឋាភិបាល ជូនពលរដ្ឋឲ្យបានគ្រប់គ្នាតាមគោលដៅនិងតំបន់ដែលបានរៀបចំឡេីង៕
