លោកគាត ហ៊ុល អភិបាលក្រុងប៉ោយប៉ែត និងលោក ធិន ស៊ិនដេត អធិការរដ្ឋាននគរបាលក្រុងប៉ោយប៉ែត មិនគួរបណ្តែតបណ្តោយឲ្យល្បែងស៊ីសង តាមកញ្ចក់ទូរទស្សន៍បើកលេងបំពុលសង្គមបន្តទៀតនោះទេ

ខេត្តបន្ទាយមានជ័យ  ៖ ហាងកាហ្វេបើកលេង កីឡាប្រដាល់ ថៃ ជាល្បែងស៊ីសងភ្នាល់ដាក់លុយកំពុងពេញនិយម ឈ្នះចាញ់រាប់ លានរៀល ស្រែកហ៊ោកញ្ជៀវបង្កការរំខានដល់ពលរដ្ឋកើតមានយ៉ាងអនាធិបតេយ្យពាសពេញក្រុងប៉ោយប៉ែត ខេត្តបន្ទាយមា​ន​ជ័​យ សង្ស័យសមត្ថកិច្ចពាក់ព័ន្ធ ទទួលបានលាភសក្ការៈ ទើបមិនបង្ក្រាបទាល់តែសោះ  ។

តាមសេចក្តីរាយការណ៍ពីប្រជាពលរដ្ឋនៅក្រុងប៉ោយប៉ែតបានឲ្យដឹងថា ទីតាំងហាងកាហ្វេ កីឡាប្រដាល់ ថៃ ជាល្បែងភ្នាល់ស៊ីសងដាក់​លុយឈ្នះចាញ់រាប់លានរៀលក្នុង១គូៗនោះមាន , ១ទីតាំងហាងកាហ្វេបើកលេងកីឡាប្រដាល់ ថៃ នៅផ្លូវផ្សារត្រីស្ថិតក្ងភូមិក្បាលស្ពាន ២ សង្កាត់ប៉ោយប៉ែត , ទី២ ទីតាំងហាងកាហ្វេបើកលេងកីឡាប្រដាល់ ថៃ នៅផ្លូវជួផ្ទះល្វែង ស្ថិតក្នុងភូមិបាលិលេយ្យ១ ស​ង្កាត់ប៉ោយប៉ែត , ទី៣ ទីតាំងហាងកាហ្វេ បើកលេងកីឡាប្រដាល់ ថៃ នៅចំណុច(ដីថ្មី ) មណ្ឌល២ សង្កាត់ផ្សារកណ្តាល , និងទី៤ ​ហា​ងកាហ្វេមួយកន្លែងនៅចំណុចជាប់ផ្លូវជាតិលេខ៥ ទល់មុខការ៉ាសសាំង ស្ថិតនៅភូមិផ្សារកណ្តាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ  ។

ប្រជាពលរដ្ឋ បានប្រាប់ថា ជារៀងរាល់ថ្ងៃសៅរ៍ និងថ្ងៃអាទិត្យ មានអ្នកញៀនល្បែងកីឡាប្រដាល់ នៅតាមហាងកាហ្វេ បាននាំគ្នាលេង​ល្បែងកីឡា ប្រដាល់ក្នុង១គូៗ ភ្នាល់ដាក់លុយរាប់ម៉ឺន រាប់សែន រហូតដល់រាប់លានរៀល យ៉ាងអនាធិបតេយ្យ និង មានការស្រែ​កហ៊ោកញ្ច្រៀវ លឺសម្លេង ខ្លាំងៗទៀតផង ធ្វើឲ្យមានការរំខានដល់ អ្នកជិតខាងនៅទីនោះផងដែរ  ។

ប្រភពបន្តទៀតថា ទីតាំងហាងកាហ្វេ បើកលេងល្បែង កីឡាប្រដាល់ថៃ ភ្នាល់ដាក់លុយ កើតមានយ៉ាងអនាធិបតេយ្យនោះមក ពួ​ក​គាត់មានការភ្ញាក់ផ្អើលនិងអ្នកញៀនល្បែងស៊ីសង ដាក់លុយ យ៉ាងខ្លាំង ហើយ ថែមទាំងរំខានដល់ កូនចៅរបស់ពួកគាត់ មិ​ន​ដែលបានដេកពួនពេញភ្នែកនោះ ទេ ! មិនថាថ្ងៃឬយប់ទេ ឲ្យតែមាន កីឡាប្រដាល់ថៃ នោះ គឺពួកគេ ចាប់បើកលេងស្រែក​ហ៊ោ​កញ្ជៀវ បន្លឺសម្លេងខ្លាំងៗ តាំងពីថ្ងៃម៉ោង១២ថ្ងៃត្រង់រហូតដល់ម៉ោង១២យប់ទើបពួកគេឈប់សម្រាកផងដែរ  ។

ប្រជាពលរដ្ឋ មានការងឿងឆ្ងល់យ៉ាងខ្លាំងថា តើសមត្ថកិច្ចពាក់ព័ន្ធក្នុងមូលដ្ឋានក្រុងប៉ោយប៉ែត ខេត្តបន្ទាយមានជ័យ មិនមានវិធានការ បង្រ្កាបហាងកាហ្វេ ដែលបើកល្បែងកីឡាប្រដាល់ ថៃ ស៊ីសងភ្នាល់ដាក់លុយរបៀបអនាធិបតេយ្យទាំងនេះម្តងណាឡើយ ! ឬមួយក៏ហាងកាហ្វេ កីឡាប្រដាល់ថៃ ភ្នាល់ដាក់លុយដូចជាល្បែងស៊ីសងទាំងអស់នេះ ជាប្រភពចំណូល និងជា ឆ្នាំងបាយ សម្រាប់ចិញ្ចឹមជីវភាព របស់ពួកគេទើបមិនហ៊ានបង្ក្រាប ?

ប្រជាពលរដ្ឋបានលើកឡើងថា ពួកគាត់ពិតជាខកចិត្តខ្លាំងណាស់ទៅលើសមត្ថកិច្ចពាក់ព័ន្ធនៅក្នុងក្រុងប៉ោយប៉ែត ដែលយកតួនាទីរបស់ខ្លួនភូតភរកុហកដល់ប្រជាពលរដ្ឋ និង រហូតដល់ប្រមុខថ្នាក់ដឹកនាំ ដែលតែងតែលើកពីបញ្ហា ភូមិ ឃុំ មានសុវ​ត្ថិភា​ព​ទាំង ៩ចំណុចឲ្យពួកគាត់មានការជឿជាក់ នាពេលកន្លងមក ដូច្នេះលោកគាត ហ៊ុល អភិបាលក្រុងប៉ោយប៉ែត និងលោក ធិន ស៊ិ​ន​ដេត អធិការរដ្ឋាននគរបាលក្រុងប៉ោយប៉ែត មិនគួរបណ្តែតបណ្តោយឲ្យល្បែងស៊ីសង តាមកញ្ចក់ទូរទស្សន៍បើកលេងបំពុលសង្គមបន្តទៀតនោះទេ  ៕