ត្បូងឃ្មុំ)៖ឯកឧត្តមបណ្ឌិតជាមច័ន្ទសោភ័ណសមាជិកថ្នាក់កណ្តាលគណបក្សប្រជាជនកម្ពុជានិងជាអនុប្រធានគណបក្សប្រជាជនខេត្តត្បូងឃ្មុំបានណែនាំឲ្យប្រធានគណបក្សប្រជាជនស្រុកមេមត់ត្រូវរៀបចំក្រុមអ្នកច្បាប់ដើម្បីត្រៀមសម្រាប់ការបោះឆ្នោតនាពេលខាងមុខព្រមទាំងត្រូវជ្រើសរើសបេក្ខជនឈរឈ្មោះដែលមានប្រជាប្រិយភាពសមត្ថភាពគ្រប់គ្រាន់ភាពឆ្លាតវៃជាការទាក់ទាញស្រលាញ់គាំទ្រផ្តល់ទំនុកចិត្តពីសំណាក់ប្រជាជនទៅកាន់បុគ្គលរូបនោះក៍ដូចជាមកលើគណបក្សប្រជាជនកម្ពុជា។
ក្នុងឳកាសអញ្ជើញជាអធិបតីបើកកិច្ចប្រជុំផ្សព្វផ្សាយ”ផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ឆ្នាំ២០២២” ក្នុងមូលដ្ឋានស្រុកមេមត់នាថ្ងៃទី១៧ខែកក្កដាឆ្នាំ២០២១នេះឯកឧត្តមបណ្ឌិតជាមច័ន្ទសោភ័ណក៍បានចង្អុលបង្ហាញបន្ថែមនូវចំណុចសំខាន់ៗមួយចំនួនដែលដកស្រង់ចេញពីសេចក្តីសម្រេចនៃផែនការជូនដល់សមាជិកសមាជិកាបានយល់ជ្រួតជ្រាបច្បាស់លាស់និងស៊ីជម្រៅដើម្បីយកទៅអនុវត្តឲ្យទទួលបានប្រសិទ្ធភាពនិងប្រសិទ្ធផលឈានទៅសម្រេចតាមផែនការដែលបានគ្រោងទុកសម្រាប់អាណត្តិទី៥។
មានប្រសាសន៍នាឳកាសនោះឯកឧត្តមបណ្ឌិតជាមច័ន្ទសោភ័ណបានធ្វើការរំលឹកជូនអង្គប្រជុំពិសេសប្រធានគណបក្សប្រជាជនស្រុក–ឃុំដោយសង្ខេបអំពីជ័យជំនះនៃការបោះឆ្នោតជ្រើសរើសក្រុមប្រឹក្សាឃុំ–សង្កាត់ក្នុងមូលដ្ឋានស្រុកមេមត់ទទួលបានដើម្បីរក្សាបាននូវភាពជោគជ័យនេះសមាជិកសមាជិកាពិសេសប្រធានគណបក្សឃុំត្រូវបន្តរក្សាឲ្យបានចំណុចខ្លាំងត្រូវប្រតិបត្តិឲ្យកាន់តែល្អប្រសើរជាបន្តបន្ទាប់ស្របតាមស្ថានការជាក់ស្តែង។
ជាពិសេសចំណុចខ្សោយចាំបាច់ត្រូវសិក្សាស្វែងយល់ឲ្យបានស៊ីជម្រៅពិនិត្យនិងកែលម្អឲ្យបានល្អប្រសើរឡើងវិញដើម្បីធានាឲ្យបានជោគជ័យស្របតាមផែនការសកម្មភាពដែលត្រូវអនុវត្តដើម្បីឈានទៅសម្រេចឲ្យបានជោគជ័យនាឆ្នាំ២០២២។
បន្ថែមពីនេះឯកឧត្តមបណ្ឌិតបានក្រើនរំលឹកដល់លោកមេឃុំទាំងអស់ត្រូវបន្តការផ្តល់សេវាសាធារណៈឲ្យបានល្អនិងលឿនហាមដាច់ខាតការទារតម្លៃសេវាលើសពីការកំណត់ត្រូវយកចិត្តទុកដាក់សុខទុក្ខនៅកៀកជាប់ជាមួយពលរដ្ឋក្នុងមូលដ្ឋានក្តាប់ឲ្យជាប់រាល់បញ្ហានានាដើម្បីដោះស្រាយឲ្យបានទាន់ពេលវេលាទាំងអស់នេះជាកាតព្វកិច្ចចាំបាច់ដែលត្រូវតែអនុវត្តន៍ឲ្យខានតែបាននិងមានប្រសិទ្ធភាពទាំងនេះសុទ្ធសឹងជះឥទ្ធិពលដល់ការទាក់ទាញសមាណចិត្តការស្រលាញ់គាំទ្រពលរដ្ឋសម្រាប់ការបោះឆ្នោតទាំងក្រុមប្រឹក្សាឃុំ–សង្កាត់នាឆ្នាំ២០២២និងបោះឆ្នោតថ្នាក់ជាតិនាឆ្នាំ២០២៣ខាងមុខនេះ៕
