ខេត្តតាកែវ ៖ បន្ទាប់ពីធ្វើការស្រាវជ្រាវយ៉ាងម៉ត់ចត់អំពីបទល្មើសជួញដូរគ្រឿងញៀនក្នុងមូលដ្ឋានខេត្តតាកែវ ទៅតាមបទបញ្ជាយ៉ាងម៉ឺងម៉ាត់របស់ លោក ឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ នៅវេលាម៉ោង ១២.៣០នាទី ថ្ងៃច័ន្ទ ០៧រោច ខែកក្តិក ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី ១៨ ខែ វិច្ឆិកា ឆ្នាំ ២០១៩ កម្លាំងជំនាញរបស់អធិការដ្ឋាននគរបាលស្រុកបាទី សហការជាមួយកម្លាំងប៉ុស្តិ៍នគរបាលរដ្ឋលំពង់ បានចុះបង្រ្កាបមុខសញ្ញាជួញដូរគ្រឿងញៀនចំនួន០៣នាក់ នៅចំណុចភូមិត្រពាំងគ្រោះ ឃុំលំពង់ ស្រុកបាទី ខេត្តតាកែវ ។
ជនសង្ស័យដែលសមត្ថកិច្ចធ្វើការឃាត់ខ្លួនទី១. ឈ្មោះ គឹម សីហា ភេទប្រុស អាយុ ២០ឆ្នាំ មុខរបរមិនពិតប្រាកដ មានទីលំនៅភូមិពានមាសកើត ឃុំលំពង់ ស្រុកបាទី ខេត្តតាកែវ ជាមុខសញ្ញាជួញដូរសារធាតុញៀនខុសច្បាប់ ទី២. ឈ្មោះ អួន វាសនា ភេទប្រុស អាយុ ៣៤ឆ្នាំ មុខរបរកម្មកររោងចក្រ មានទីលំនៅភូមិពានមាសកើត ឃុំលំពង់ ស្រុកបាទី ខេត្តតាកែវ ជាមុខសញ្ញាប្រើប្រាស់សារធាតុញៀនខុសច្បាប់ និងទី៣. ឈ្មោះ វ៉ាត ផានុត ភេទប្រុស អាយុ ២៣ឆ្នាំ មុខរបរមិនពិតប្រាកដ មានទីលំនៅភូមិកណ្តាល ឃុំលំពង់ ស្រុកបាទី ខេត្តតាកែវ ជាមុខសញ្ញាប្រើប្រាស់សារធាតុញៀនខុសច្បាប់ ។
ករណីនេះបន្ទាប់ពីសមត្ថកិច្ច ឃាត់ខ្លួនជនសង្ស័យបានហើយកម្លាំងជំនាញបានធ្វើការដកហូត វត្ថុតាងរួមមាន ម្សៅក្រាមពណ៌សថ្លា ០៨កញ្ចប់ (ធំ ០១កញ្ចប់ តូច០៧កញ្ចប់) ម៉ូតូ ០២គ្រឿង និង ទូរស័ព្ទដៃ ០២គ្រឿង ។
បច្ចុប្បន្នជនសង្ស័យ និងវត្ថុតាង កម្លាំងជំនាញកំពុងកសាងសំណុំរឿងតាមនីតិវិធី និងស្រាវជ្រាវរកបក្ខពួកដែលនៅសេសសល់មកផ្តន្ទាទោសតាមច្បាប់ ។
