(ត្បូងឃ្មុំ)៖ព្រឹកថ្ងៃទី៣០ខែតុលាឆ្នាំ២០២១នេះឯកឧត្តមបណ្ឌិតជាមច័ន្ទសោភ័ណអភិបាលខេត្តនិងជាប្រធានគណៈកម្មាធិការសាខាកាកបាទក្រហមខេត្តត្បូងឃ្មុំ
អញ្ជើញចុះសំណេះសំណាលនិងនាំយកអំណោយដ៏ថ្លៃថ្លារបស់សម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនប្រធានកាកបាទក្រហមកម្ពុជាចែកជូនពលរដ្ឋ២០០គ្រួសារដែលមានជីវភាពខ្វះខាតលំបាកក្នុងឃុំរការខ្នុរស្រុកក្រូចឆ្មារ។
មានប្រសាសន៍សំណេះសំណាល ឯកឧត្តមបណ្ឌិតជាមច័ន្ទសោភ័ណបានពាំនាំប្រសាសន៍ផ្តាំផ្ញើសួរសុខទុក្ខពីសំណាក់សម្តេតេជោហ៊ុនសែននាយករដ្ឋមន្ត្រីនៃកម្ពុជានិងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនប្រធានកាកបាទក្រហមកម្ពុជាព្រមទាំងឯកឧត្តមឧបនាយករដ្ឋមន្ត្រីជាសុផារ៉ាប្រធានក្រុមការងារថ្នាក់ជាតិចុះមូលដ្ឋានខេត្តត្បូងឃ្មុំជូនចំពោះប្រជាពលរដ្ឋដែលមានជីវភាពខ្វះខាតលំបាកទាំងអស់ដោយក្តីនឹករលឹកអាណិតអាសូរនិងតែងតែព្រួយបារម្ភគិតគូរពីសុខទុកប្រជាពលរដ្ឋគ្រប់ពេលវេលា។
ឯកឧត្តមបណ្ឌិតអភិបាលខេត្តបានណែនាំដល់អាជ្ញាធរស្រុកឃុំភូមិត្រូវបន្តផ្សព្វផ្សាយសារអប់រំឱ្យបានជាប់ជាប្រចាំដល់ប្រជាពលរដ្ឋនូវវិធានការ«៣កុំនិង៣ការពារ» ក៏ដូចជាពលរដ្ឋដែលមិនទាន់ចាក់វ៉ាក់សាំងការពារជំងឺកូវីដ១៩សូមរួសរាន់ទៅចាក់ដើម្បីបញ្ចៀសការស្លាប់ពិសេសក្នុងការចូលរួមប្រយុទ្ធប្រឆាំងនឹងការឆ្លងរាលដាលនូវជំងឺដ៏កាចសាហាវនេះ។
ឆ្លៀតក្នុងឳកាសនោះឯកឧត្តមបណ្ឌិតជាមច័ន្ទសោភ័ណបានថ្លែងប្រាប់បងប្អូនប្រជាពលរដ្ឋនូវការយកចិត្តទុកដាក់ខ្ពស់គ្រប់កាលៈទេសៈពីសំណាក់សម្តេចតេជោហ៊ុនសែននិងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនដោយផ្តល់ជូនអំណោយពលរដ្ឋជនងាយរងគ្រោះទាំងអស់ស្មើៗគ្នាដោយមិនប្រកាន់ពូជសាសន៍ពណ៍សម្បុរនិងនិន្នាការនយោបាយនោះឡើយពិសេសតាមរយៈគោលនយោបាយឧបត្ថម្ភដល់បងប្អូនក្រ១ក្រ២និងស្ត្រីពពោះជាដើម។
ដោយឡែកក្នុងបរិបទកូវីដ១៩នេះសម្តេចតេជោបានបន្តផ្តល់ភាពកក់ក្តៅដោយពលរដ្ឋទទួលបានការចាក់វ៉ាក់សាំងដោយឥតគិតថ្លៃ, ព្យាបាលមិនយកលុយផ្តល់អាហារ៣ពេលពិសេសផ្តល់២លានរៀលគ្រួសារអ្នកស្លាប់ដោយជំងឺកូវីដ១៩និង១លានរៀលជូនក្រុមការងារចាត់ចែងសពផងដែរ។
ជាចុងក្រោយឯកឧត្តមបណ្ឌិតជាមច័ន្ទសោភ័ណអភិបាលខេត្តបានអំពាវនាវដល់ពលរដ្ឋគ្រប់អាយុ១៨ឆ្នាំមានឈ្មោះក្នុងបញ្ជីបោះឆ្នោតសូមទៅពិនិត្យផ្ទៀងផ្ទាត់បញ្ជីឈ្មោះបោះឆ្នោតឲ្យបានត្រឹមត្រូវដើម្បីមានសិទ្ធអាចបោះឆ្នោតនាពេលខាងមុខនេះពិសេសបោះឆ្នោតជូនសម្តេចតេជោហ៊ុនសែនជានាយករដ្ឋមន្ត្រីគ្រប់អាណត្តិដើម្បីបន្តដំណើរអភិវឌ្ឍន៍ម្ពុជាបន្តទៀត។
បើតាមលោកវងវ៉ាន់នីនាយកសាខាកាកបាទក្រហមខេត្តបានឱ្យដឹងថាចំពោះអំណោយដែលផ្តល់ជូនទាំង២០០គ្រួសារក្នុង១គ្រួសារទទួលបានអង្ករ១បេមី១កេសទឹកត្រី១យួរទឹកសុីអុី១យួរត្រីខ១យួរប្រេងឆា១ដបនិងថវិកាមួយចំនួន៕
