ខេត្តរតនគីរី ៖ ទីតាំងល្បែងបញ្ជល់មាន់អាប៉ោងយូគីមួយកន្លែង នៅក្នុងចំការកៅស៊ូរបស់លោកពៅ សៀក ស្ថិតនៅចំណុចភ្នំអូរត្រាវ ក្រុងបានលុង ខេត្តរតនគិរី ។
ប្រភពព័ត៌មានពីប្រជាពលរដ្ឋដែលរស់នៅជិតកន្លែងសង្វៀននោះបានឲ្យដឹងថា ជារៀងរាល់ថ្ងៃគេឃើញមានម៉ូតូ រថយន្តស៊េរីទំនើបៗ ដឹកមាន់ជល់ចូលទៅក្នុងចំការកៅស៊ូ ដើម្បីណាត់គ្នាបញ្ជល់ និងលេងល្បែងស៊ីសងគ្រប់ប្រភេទ ចាក់ទឹកលុយរាប់ពាន់ដុល្លារស្រែកហ៊ោកញ្ច្រៀវពេញក្នុងចំការ ហើយគាត់បន្តទៀតថា ម្ចាស់សង្វៀននេះពីមុនគាត់ជាអ្នកមានអំណាចម្នាក់ក្នុងខេត្តរតនគិរី តែឥឡូវអស់អំណាចហើយ ព្រោះដល់អាយុត្រូវចូលនិវត្តន៍ តែគាត់មិនបានបង្ហាញប្រាប់ឈ្មោះនោះទេ ។
ដូច្នេះហើយបានជាសង្វៀននេះ បើកលេងបានយ៉ាងរលូនដោយសារតែមានការយោគយល់ពីអាជ្ញាធរថ្នាក់ស្រុករហូតដល់ថ្នាក់ខេត្ត ហើយមានមេការម្នាក់ចាំមើលខុសត្រូវនៅកន្លែងសង្វៀននោះឈ្មោះលោក( ជាងតន )។
ប្រជាពលរដ្ឋបានសំណូមពរដល់អាជ្ញាធរសមត្ថកិច្ចគ្រប់ជាន់ថ្នាក់ក្នុងខេត្តរតនគិរី សូមចាត់វិធានការបង្ក្រាប និងទប់ស្កាត់ផងល្បែងស៊ីសងនេះផង ដែលល្បែងស៊ីសង បង្កឲ្យមានហិង្សាក្នុងគ្រួសារ ចោរ ឆក់ លួច ប្លន់ និងបង្កឲ្យមាន គ្រឿងញៀនជាដើម ដែលធ្វើនាំឲ្យបាត់បង់នូវភូមិឃុំមានសុវត្ថិភាពទាំង៩ចំណុច ។
ជាពិសេស លោក ហ៊ួត បូរី អធិការនគរបាលក្រុងបានលុង និង លោកហៃ សុវណ្ណារ៉ា មេបញ្ជាការកងរាជអាវុធហត្ថក្រុងបានលុង សូមចាត់វិធានការទប់ស្កាត់ និងបង្ក្រាបនូវល្បែងស៊ីសងគ្រប់ប្រភេទដែលជាតួនាទីរបស់លោកជាអ្នកទទួលខុសត្រូវ និងរក្សាឲ្យបាននូវភូមិឃុំមានសុវត្ថិភាពទាំង៩ចំណុចជូនប្រជាពលរដ្ឋ និងសន្តិសុខសង្គមជាតិ ។
