ខេត្តតាកែវ ៖ នាព្រឹកថ្ងៃពុធ០១កើត ខែមិគសិរ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៧ ខែវិច្ឆិកា ឆ្នាំ២០១៩ នៅសាលប្រជុំស្នងការដ្ឋាននគរបាលខេត្តតាកែវ មានរៀបចំកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការ រក្សាសន្តិសុខ សណ្តាប់ធ្នាប់ សង្គមប្រចាំខែវិច្ឆិកា និងលើកទិសដៅអនុវត្តបន្តខែធ្នូ ឆ្នាំ២០១៩ និងមានប្រកាសផ្ទេរភារកិច្ច តែងតាំងមុខតំណែង បំពាក់ឋានន្តរសក្តិជូនមន្រ្តីនគរបាលជាតិ នៃស្នងការដ្ឋាននគរបាលខេត្តតាកែវ ។
ពិធីនេះស្ថិតក្រោមអធិបតីភាពដ៏ខ្ពង់ខ្ពស់លោក ឧត្តមសេនីយ៍ទោ សុខ សំណាង ស្នងការ នៃស្នងការដ្ឋាននគរបាលខេត្តតាកែវ ដោយមានការអញ្ជើញចូលរួមពីលោក លោកស្រី ឧត្តមសេនីយ៍ វរសេនីយ៍ ជាស្នងការរង ទាំង១២ផែន លោកនាយការិយាល័យជំនាញ ទាំង៣២ លោកអធិការនគរបាលទាំង ៩ស្រុកមួយក្រុង លោកមេបញ្ជាការវរសេនាតូចនគរបាលការពារព្រំដែនគោកលេខ ៦០៣ និងមន្រ្តីក្រោមឱវាទសរុបចំនួន៤៣២នាក់ ស្រី១៦នាក់ ។
ក្នុងឱកាសនោះលោក វរសេនីយ៍ទោ សុខ ស៊ុយ នាយរងការិយាល័យសរុបផែនការ បានអានរបាយការណ៍ប្រចាំខែវិច្ឆិកា លើកទិសដៅការងារខែធ្នូ ឆ្នាំ២០១៩ រួចមកលោក ឧត្តមសេនីយ៍ទោស្នងការ គណៈអធិបតីបានផ្តល់កិត្តិយសបំពាក់ឋានន្តរសក្តិ និងប្រកាសតែងតាំងមុខតំណែងជូនមន្រ្តីនគរបាលជាតិ នៃស្នងការដ្ឋាននគរបាលខេត្តតាកែវ និងប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្តិចំនួន ២០៩ នាក់ ស្រីចំនួន ១៥ នាក់ និងប្រគល់ប្រកាសតួនាទីភារកិច្ចជូនលោក ស្នងការរងចំនួន០២នាក់ និង លោកអធិការចំនួន១នាក់រួមមាន ៖
-ថ្នាក់អនុសេនីយ៍ឯក ចំនួន៧៩នាក់
-ថ្នាក់អនុសេនីយ៍ទោ ចំនួន៤៣នាក់
-ថ្នាក់អនុសេនីយ៍ត្រី ចំនួន២០នាក់
-ថ្នាក់ព្រិន្ទបាលឯក ចំនួន៨នាក់ ។
ថ្លែងទៅកាន់អង្គពិធីប្រជុំនោះ ដែរលោក ឧត្តមសេនីយ៍ទោ ស្នងការ បានសំណេះសំណាលណែនាំផ្តាំផ្ញើរ ក្រើនរំលឹកដាស់តឿន និងពង្រឹងវិន័យលេខ(០០៦បបជ) របស់កងកម្លាំងនគរបាលជាតិ ដល់មន្រ្តីនគរបាលទទួលបានការតែងតាំងថ្មីៗ ត្រូវតែខិតខំបំពេញភារកិច្ចឲ្យបានល្អទៅតាមជំនាញដែលថ្នាក់លើប្រគល់ជូន ព្រមទាំងជម្រុញឲ្យថ្នាក់ដឹកនាំគ្រប់លំដាប់ថ្នាក់ ឲ្យយកចិត្តទុកដាក់កម្រិតខ្ពស់ក្នុងពេលប្រចាំការ២៤ម៉ោងលើ ២៤ ម៉ោង ចេញល្បាតចល័ត និង ផ្តល់សេវាសាធារណៈជូនប្រជាពលរដ្ឋ ឲ្យទាន់ពេលវេលា និង អនុវត្តឱ្យបានសកម្មនូវគោលនយោបាយភូមិ ឃុំមានសុវត្ថិភាព ដើម្បីកាត់បន្ថយបទល្មើសគ្រប់ប្រភេទ ក្នុងមូលដ្ឋានខេត្តផងដែរ ៕
