(ត្បូងឃ្មុំ)លោកឧត្តមសេនីយ៍ត្រី ម៉ុន មាគ៌ា ស្នងការនគរបាលខេត្តត្បូងឃ្មុំ បានអញ្ជើញជាអធិបតីភាពដ៏ខ្ពង់ខ្ពស់ ដឹកនាំ “ពិធីប្រជុំបូកសរុបសភាពការណ៍ លទ្ធផលការអនុវត្តន៍ការងារនគរបាល និងសហគមន៍ ប្រចាំខែមិថុនា និងលើកទិសដៅបន្ត នៅព្រឹកថ្ងៃអាទិត្យ ទី០៣ ខែកក្កដា ឆ្នាំ២០២២ វេលាម៉ោង៨:០០នាទី នៅសាលប្រជុំធំ នៃស្នងការដ្ឋាននគរបាលខេត្តត្បូងឃ្មុំ ផ្សព្វផ្សាយផែនការការពារ០៨១០ និងការបង្កើតក្រុមការងារចុះផ្សព្វផ្សាយស្តីអំពី ច្បាប់ចរាចរណ៍ផ្លូវគោក ផលប៉ះពាល់នៃគ្រឿងញៀន បញ្ហាក្មេងទំនើង ការត្រៀមលក្ខណៈសម្បត្ដិ បង្ការ ផ្គររន្ទះ ទឹកជំនន់ បាក់ច្រាំងទន្លេ បង្ការទប់ស្កាត់និងអន្តរាគមន៍គ្រោះអគ្គីភ័យ ក្នុងភូមិសាស្ត្រខេត្តត្បូងឃ្មុំ និងខេត្តជាប់ព្រំប្រទល់ក្រុង–ស្រុក ឲ្យបានទាន់ពេលវេលា” ។
ដោយមានការចូលរួម លោក លោកស្រីស្នងការរង លោកនាយការិយាល័យ លោកមេបញ្ជាការ វរសេនាតូចនគរបាលការពារព្រំដែនគោកលេខ ៦១៥ និង៦១៧ លោកអធិការ ក្រុង–ស្រុកទាំង៧ លោកនាយប៉ុស្តិ៍នគរបាលការពារព្រំដែនគោកទាំង១៦ប៉ុស្តិ៍ និងលោកនាយប៉ុស្តិ៍នគរបាលរដ្ឋបាល ទាំង ៦៤ប៉ុស្តិ៍ ។
លោកឧត្តមសេនីយ៍ស្នងការ បានកោតសរសើរចំពោះ មន្ត្រីនៅតាមបណ្ដាអង្គភាពទាំងអស់ ចំណុះស្នងការដ្ឋាននគរបាលខេត្តត្បូងឃ្មុំ ដែលបានខិតខំប្រឹងប្រែងបំពេញការងារ បម្រើសេវាសាធារណៈ ក្នុងការ ថែរក្សា សន្តិសុខ សុវត្ថិភាព សណ្ដាប់ធ្នាប់ ជូនបងប្អូនប្រជាពលរដ្ឋ នៅក្នុងភូមិសាស្ត្រខេត្តត្បូងឃ្មុំ បានយ៉ាងល្អប្រសើរ ។ ជាពិសេសក្នុងពេលថ្មីៗកន្លងទៅនេះ គឺកម្លាំងនគរបាលយើង បានសហការណ៍គ្នាយ៉ាងស្អិតរមួត ក្នុងការចុះបង្ក្រាបជាក់ស្ដែងលើជនសង្ស័យ ដែលផ្សព្វផ្សាយព័ត៌មានបំពុលសង្គម លើបណ្ដាញ TikTok ទាក់ទងទៅនឹងព័ត៌មានខ្លែងក្លាយ ថាមានអ្នកជំងឺស្លាប់ដោយជំងឺកូវីដ១៩ នៅខេត្តកោះកុង ។
លោកឧត្តមសេនីយ៍ស្នងការ បានមានប្រសាសន៍បន្ថែម ឲ្យមន្ត្រីទាំងអស់ បន្តការយកចិត្តទុកដាក់ សាមគ្គីភាពផ្ទៃក្នុង នឹងអង្គភាពនានា ការការពារ ថែរក្សា សន្តិសុខ សុវត្ថិភាព សណ្តាប់ធ្នាប់ ត្រៀមជួយអន្តរាគមន៍ ការពារនឹងអូសក្បូនថ្នាក់ដឹកនាំអញ្ជើញមកឆ្លងកាត់ខេត្តត្បូងឃ្មុំ ការផ្សព្វផ្សាយបន្ថែមដល់ប្រជាពលរដ្ឋ ទាក់ទងទៅនឹងច្បាប់ចរាចរណ៍ផ្លូវគោក ភូមិ–ឃុំ–សង្កាត់ មានសុវត្ថិភាពទាំង ០៧ចំណុច ផលប៉ះពាល់នៃគ្រឿងញៀន បង្ការសង្គ្រោះពន្លត់អគ្គីភ័យ បន្តបង្ក្រាបរាល់ល្បែងស៊ីសងខុសច្បាប់នានា គ្រោះថ្នាក់ធម្មជាតិ នៅក្នុងភូមិសាស្ត្រ ដែលខ្លួនទទួលខុសត្រូវ និងបានដាក់ចេញនូវទិសដៅបន្តសម្រាប់អនុវត្តន៍ មានចំនួន ២២ចំណុច សំខាន់ៗ ជូនមន្ត្រីជំនាញនានា សម្រាប់យកមកអនុវត្តន៍ ពិសេសការពង្រឹងសមត្ថភាពកម្លាំងប្រជាការពារ នៅតាមមូលដ្ឋាន។
