រហូតមកដល់ពេលនេះឈ្មួញមួយចំនួននៅតែធ្វើសកម្មភាពកាប់ឈើនិងដឹកជញ្ជូនឈើចេញពីព្រៃអង់តែន ស្រុកសន្ទុក និងព្រៃឡង់ ស្រុកសណ្ដាន់ យ៉ាងរាលដាលដោយសារមានការឃុបឃិតពីសំណាក់មន្ត្រីបរិស្ថាន មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធ។ ប្រភពខ្លះបានឲ្យដឹងថា លោក តុប កក្កដា ប្រធានមន្ទីរបរិស្ថានខេត្តកំពង់ធំ គឺជាមេខ្លោងនៅពីក្រោយបទល្មើសព្រៃឈើ ហើយលោក តុប កក្កដា មានជំនាញខាងធ្វើរបាយការណ៍ភូតភរថ្នាក់ដឹកនាំក្រសួងបរិស្ថាន យ៉ាងប៉ិនប្រសប់។ ប្រការនេះហើយដែលធ្វើឲ្យព្រៃឈើនៅតំបន់ព្រៃឡង់និងព្រៃអង់តែន ខេត្តកំពង់ធំ ប្រឈមនឹងការបំផ្លាញគ្មានទីបញ្ចប់ ព្រោះថ្នាក់ដឹកនាំក្រសួងបរិស្ថាន ជាពិសេសលោក សាយ សំអាល់ រដ្ឋមន្ត្រីក្រសួងបរិស្ថាន ជឿតែតាមរបាយការណ៍របស់មន្ត្រីថ្នាក់ក្រោមប៉ុណ្ណោះ។
ប្រភពពីសកម្មជនព្រៃឈើនិងមន្ត្រីអង្គការក្រៅរដ្ឋាភិបាលបានឲ្យដឹងថា បច្ចុប្បន្នបទល្មើសកាប់ឈើនិងដឹកជញ្ជូនឈើចេញពីតំបន់ព្រៃឡង់ ស្រុកសណ្ដាន់ ខេត្តកំពង់ធំ នៅតែកើតមានយ៉ាងពេញបន្ទុកដោយសារមានការឃុបឃិតបើកដៃពីសំណាក់មន្ត្រីបរិស្ថានប្រចាំតំបន់នេះ។ ជាក់ស្ដែងប្រធានស្នាក់ការបរិស្ថានឈ្មោះ សាន សុឃន ឈរជើងនៅចំណុចភូមិខ្មោច ឃុំសុចិត្រ ស្រុកសណ្ដាន់ ត្រូវបានគេដឹងថា ជាអ្នកឃុបឃិតឲ្យឈ្មួញនិងជនល្មើសកាប់ឈើ ដឹកជញ្ជូនឈើចេញពីព្រៃឡង់ យ៉ាងរាលដាលហើយនៅពេលប្រជាពលរដ្ឋដឹកឈើគ្រាក់ ឬដឹកអុសបន្តិចបន្តួចត្រូវប្រឈមនឹងការបង្ក្រាបឬការពិន័យយ៉ាងកំរោល ។ ករណីលោក សាន សុឃន ហ៊ានធ្វើអ្វីៗតាមអំពើចិត្ត គឺដោយសារមានការឃុបឃិតបើកដៃពីសំណាក់លោក តុប កក្កដា ប្រធានមន្ទីរបរិស្ថានខេត្តកំពង់ធំ ផងដែរ ទើបអ្វីៗអាចប្រព្រឹត្តទៅដោយរលូន ហើយព្រៃឡង់នៅឃុំសុចិត្រ រងការបំផ្លាញយ៉ាងមហន្តរាយ។
ប្រភពពីប្រជាពលរដ្ឋនៅឃុំសុចិត្រ បានឲ្យដឹងថា មន្ត្រីបរិស្ថាន ឈ្មោះ សាន សុឃន ឈរជើងនៅចំណុចភូមិអូរខ្មោច ឃុំសុចិត្រ តែងគាបយកលុយពីប្រជាពលរដ្ឋដែលដឹកឈើគ្រាក់ បនិ្តចបន្តួចមកធ្វើរបងផ្ទះដោយគ្មានការយោគយល់ឡើយ ។ ផ្ទុយទៅវិញនៅពេលក្រុមឈ្មួញ ក្រុមជនល្មើសដឹកជញ្ជូនឈើតាមរថយន្តធុនធំ រថយន្តកូរ៉េ ឬគោយន្តច្នៃយ៉ាងពេញបន្ទុកមិនដែលឃើញឈ្មោះ សាន សុឃន ចាត់វិធានការបង្ក្រាបតាមតួនាទីរបស់ខ្លួននោះទេ។ ការដែលឈ្មោះ សាន សុឃន ប្រើអំណាចគាបយកលុយពីប្រជាពលរដ្ឋរាប់លានរៀលមិនសមនឹងទំហំបទល្មើសបន្តិចបន្តួចទើបប្រជាពលរដ្ឋលាតត្រដាងអំពើពុករលួយរបស់ឈ្មោះ សាន សុឃន ជាសាធារណៈដើម្បីឲ្យលោក សុខ លូ អភិបាលខេត្តកំពង់ធំ និងថ្នាក់ដឹកនាំក្រសួងពាក់ព័ន្ធ បានដឹងឮនឹងចាត់វិធានការទប់ស្កាត់ផងដែរ ។
