ខេត្តត្បូងឃ្មុំ ៖ ប្រភពពីក្រុមឈ្មួញ និងអាជីវករដឹកជញ្ជូនទំនិញឆ្លងកាត់ផ្លូវជាតិ លេខ7A ត្រង់ចំណុចថ្នល់ទទឹង ភូមិ ស្លាបក្តោង ឃុំជប់ ស្រុកត្បូងឃ្មុំ ខេត្តត្បូងឃ្មុំ បានលើកឡើងថា ៖ ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្ត មិនអនុវត្តន៍ឲ្យត្រឹមត្រូវតាមបទដ្ឋានបច្ចេកទេសដើម្បីទប់ស្កាត់រថយន្តដឹកទំនិញលើសទម្ងន់ឡើយដែលបណ្តាលឲ្យខូចផ្លូវ និងខូចស្ពាននោះទេ ។ ផ្ទុយទៅវិញ បានប្រែក្លាយជញ្ជីងថ្លឹងរថយន្តឲ្យទៅជាជញ្ជីងថ្លឹងលុយ ដោយមិនខ្លាចឯកឧត្តមស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនឡើយ ទើបលោកប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ7A ថ្នល់ទទឹងត្រូវបានក្រុមឈ្មួញនិងក្រុមអាជីវករដឹកជញ្ជូនទំនិញបើកកកាយជាបន្តបន្ទាប់ ។
ដោយហេតុថា ទោះបីពួកគាត់ផ្ទុកទំនិញលើសទម្ងន់ ឬមិនលើសទម្ងន់យ៉ាងណាក៏ដោយ ក៏ត្រូវបង់លុយតាមការកំណត់របស់លោកប្រធានជញ្ជីង និងបក្ខពួកទើបអាចបើកបររថយន្តឆ្លងកាត់ស្ថានីយ៍ជញ្ជីងថឹ្លងរថយន្តលើផ្លូវជាតិលេខ7A យ៉ាងរលូនបានដោយគ្មានឧបសគ្គ ។
ម្ចាស់រថយន្តដឹកទំនិញផ្សេងៗ ឆ្លងកាត់ស្ថានីយ៍ជញ្ជីងថ្លឹងរថយន្តថ្នល់ទទឹង បានយ៉ាងរលូនដោយមិនបាច់ចូលថ្លឹងឡើយ គឺគ្រាន់តែបង់លុយតាមទូរស័ព្ទក៏បានដែរ ការកំណត់របស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តមួយនេះជាការស្រេច។
ប្រភពពីមន្ត្រីនៅក្នុងមន្ទីរសាធារណការ និងដឹកជញ្ជូនខេត្តត្បូងឃ្មុំ មួយចំនួនបានឲ្យដឹងថា ការដែលលោកប្រធានជញ្ជីង ហ៊ានធ្វើអ្វីៗតាមអំពើចិត្ត គឺមានការឃុបឃិតបើកដៃពីសំណាក់លោកប្រធានមន្ទីរសាធារណការ និងដឹកជញ្ជូនខេត្តត្បូងឃ្មុំផងដែរ ទើបអ្វីៗអាចប្រព្រឹត្តទៅដោយរលូនបាន ។ ដូច្នេះហើយទើបប្រធានសា្ថនីយ៍ជញ្ជីងថ្លឹងរថយន្តផ្លូវជាតិលេខ7A ចំណុចថ្នល់ទទឹងអាចប្រែក្លាយជញ្ជីងថ្លឹងរថយន្តឲ្យទៅជាជញ្ជីងថ្លឹងលុយយ៉ាងសុខស្រួលគ្មានញញើតអ្វីទាំងអស់ ។
ក្រុមឈ្មួញ និងអាជីវករដឹកជញ្ជូនទំនិញឆ្លងកាត់ផ្លូវជាតិ លេខ7A ត្រង់ចំណុចថ្នល់ទទឹង ភូមិស្លាបក្តោង ឃុំជប់ ស្រុកត្បូងឃ្មុំ ខេត្តត្បូងឃ្មុំបានសំណូមពរដល់ឯកឧត្តម ស៊ុន ចាន់ថុលរដ្ឋមន្ត្រី ក្រសួងសាធារណការ និងដឹកជញ្ជូន មេត្តាពិនិត្យមើលសកម្មភាព ប្រធានជញ្ជីងថ្លឹងចំណុចថ្នល់ទទឹងផង បើពុំដូច្នេះទេផ្លូវថ្នល់ធ្វើខាងមុខ ខូចខាងក្រោយហើយឯកឧត្តម ៕
