ខេត្តកណ្តាល ៖ ថ្ងៃអាទិត្យ ៤ រោច ខែមិគសិរ ឆ្នាំកុរឯកស័ក ពុទ្ធសករាជ២៥៦៣ ត្រូវនឹងថ្ងៃទី១៥ ខែឆ្នូ ឆ្នាំ២០១៩ វេលាម៉ោង១១និង១៥នាទី មានករណីគ្រោះថ្នាក់ចរាចរណ៍មួយបានកើតឡើង នៅលើផ្លូវជាតិលេខ១ ក្នុងចន្លោះគីឡូម៉ែត្រលេខ ៣២-៣៣ ក្នុងភូមិ ព្រែកប៉ុល ឃុំបន្ទាយដែក ស្រុកកៀនស្វាយ ខេត្តកណ្តាល ។
ប្រភពពីប្រជាពលរដ្ឋបានឱ្យដឹងថា មុនពេលកើតហេតុ គេឃើញមានម៉ូតូ០១គ្រឿងម៉ាកហុងដា ឌ្រីមសេរី ឆ្នាំ២០១៩ ពណ៌ខ្មៅពាក់ស្លាកលេខភ្នំពេញ 1AF 3931 បើកបរដោយឈ្មោះ ភន សាវ៉ន ភេទ ប្រុស អាយុ ២៧ ឆ្នាំមានទីលំនៅភូមិកំពុងពោធិ៍ ឃុំកំពុងភ្នំ ស្រុកលើកដែក ខេត្តកណ្តាល ក្នុងទិសដៅពីភ្នំពេញ ឆ្ពោះទៅអ្នកលឿង ពេលមកដល់កន្លែងកើតហេតុខាងលើបានបុកជាមួយមនុស្សកំពុងដើរឆ្លងថ្នល់ ឈ្មោះ សុធី គីមលាង ភេទស្រី អាយុ ២០ឆ្នាំ មានទីលំនៅភូមិព្រែកប៉ុល ឃុំបន្ទាយដែកស្រុកកៀនស្វាយ ខេត្តកណ្តាល ពេញទំហឹងបណ្តាលឱ្យរបួសធ្ងន់ស្រាល០២នាក់ ស្រីម្នាក់ ប្រុសម្នាក់ ត្រូវបានសាច់ញាតិបញ្ចូនទៅមន្ទីរពេទ្យភ្នំពេញ ចំណែកម៉ូតូ០១គ្រឿង ត្រូវបានជំនាញចរាចរណ៍ស្រុកវាស់វែងយកទៅរក្សាទុក នៅអធិការដ្ឋាននគរបាលស្រុកកៀនស្វាយ ។
តាមការសន្និដ្ឋានរបស់សមត្ថកិច្ច ករណីនេះបណ្តាលមកពីអ្នកបើកបរម៉ូតូ ធ្វេសប្រហែសមិនមើលស្ថានភាពផ្លូវខាងមុខមានឧបសគ្គ ចំណែកឯឈ្មោះ សុធី គីមលាង ធ្វេសប្រហែស មិនមើលឆ្វេង ស្តាំ មុននឹងឆ្លងថ្នល់ ៕
