ខេត្តត្បូងឃ្មុំ ៖ នៅថ្ងៃព្រហស្បតិ៍ ១៣ កើត ខែភទ្របទ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៨ ខែកញ្ញា ឆ្នាំ២០២២
នៅស្នងការដ្ឋាននគរបាលខេត្តត្បូងឃ្មុំ បានរៀបចំពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិ ជូនមន្រ្តីនគរបាលជាតិ នៃស្នងការដ្ឋាននគរបាលខេត្តត្បូងឃ្មុំ ក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ប៉ែន វិបុលអគ្គស្នងការរងនិងជាប្រធាននាយកដ្ឋានបុគ្គលិក នៃក្រសួងមហាផ្ទៃ ជាតំណាងដ៍ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិតនេត សាវឿន អគ្គស្នងការ នគរបាលជាតិ និងឯកឧត្តម ណុប ឡង់ឌី អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម បណ្ឌិត ជាម ច័ន្ទសោភ័ណ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តត្បូងឃ្មុំ ។
ពិធីខាងលើមានការអញ្ជើញចូលរួមពី លោកឧត្តមសេនីយ៍ វរសេនីយ៍ប្រតិភូអមដំណើរគណៈធិបតី លោកព្រះរាជអាជ្ញារងខេត្តត្បូងឃ្មុំ លោកឧត្តមសេនីយ៍ស្នងការរងនគរបាលខេត្ត មេបញ្ជាការរង កងរាជអាវុធហត្ថខេត្ត មេបញ្ជាការរង តំបន់ប្រតិបត្តិការសឹករងខេត្ត លោក លោកស្រីស្នងការរងនគរបាលខេត្ត លោកនាយការិយាល័យ លោកមេបញ្ជាការវរសេនាតូចនគរបាលការពារព្រំដែនគោកទាំងពីរ អធិការក្រុង–ស្រុក និងមន្ត្រីពាក់ព័ន្ធសរុបចំនួន ២៧៦នាក់។
ប្រកាសផ្ទេរភារកិច្ច តែងតាំងមុខតំណែង និង បំពាក់ឋានន្តរស័ក្តិ ចំនួន ៨៦នាក់ ក្នុងនោះរួមមាន៖ ប្រកាសផ្ទេរភារកិច្ចនិងតែងតាំងមុខតំណែងចំនួន ៣៨នាក់ និងបំពាក់ឋានន្តរស័ក្កិចំនួន ៥៨នាក់ ។
ជាកិច្ចចាប់ផ្តើម លោកឧត្តមសេនីយ៍ត្រី ម៉ុន មាគ៌ា ស្នងការនគរបាលខេត្តត្បូងឃ្មុំ បានអញ្ជើញឡើងអានរបាយការស្វាគមន៍ និងរាយការពីសមិទ្ធផលការងារដែលជាស្នាដៃ នៃកិច្ចប្រតិបត្តិការរបស់កងកម្លាំងនគរបាលខេត្ត ដែលសម្រេចបានក្នុងរយៈពេលកន្លងមកជូនគណៈអធិបតីនិងអង្គពិធីជ្រាប ។
ឯកឧត្តម នាយឧត្តមសេនីយ៍ ប៉ែន វិបុល អគ្គស្នងការរង និងជាប្រធាននាយកដ្ឋានបុគ្គលិក បានអញ្ជើញបំពាក់ឋានន្តរស័ក្តិ និងប្រគល់សេចក្តីសម្រេច ព្រមទាំងកោតសរសើរនូវស្នាដៃ ខិតខំប្រឹងប្រែងរបស់ កងកម្លាំងនគរបាលយើង រហូតសម្រេចបាននូវកិច្ចការសំខាន់ៗជាច្រើន ក្នុងការថែរក្សាសន្តិសុខ សុវត្ថិភាព រៀបចំសណ្ដាប់ធ្នាប់សាធារណៈជនបងប្អូនប្រជាពលរដ្ឋ ។
ឯកឧត្តម នាយឧត្តមសេនីយ៍ ប៉ែន វិបុល អគ្គស្នងការរង និងជាប្រធាននាយកដ្ឋានបុគ្គលិក និង ឯកឧត្តម ណុប ឡង់ឌីអភិបាលរងខេត្ត បានមានមតិសំណេះសំណាល និងផ្តាំផ្ញើដល់មន្ត្រីដែលទើប ទទួលភារកិច្ចថ្មី បំពាក់ឋានន្តរស័ក្តិថ្ងៃនេះទាំងអស់ត្រូវខិតខំយកចិត្តទុកដាក់បំពេញភារកិច្ចបន្ថែមទៀតដើម្បីធានាបាននូវ សន្តិសុខ សុវត្ថិភាព សណ្តាប់ធ្នាប់សាធារណៈ ជូនប្រជាពលរដ្ឋ បន្ថែមពីនេះត្រូវគោរពឱ្យបានមុឺងម៉ាត់ វិន័យរបស់កងកម្លាំងនគរបាលជាតិ ដើម្បីក្លាយខ្លួនជាមន្ត្រីគំរូ មានរបៀបរបបការងារល្អ ឆ្លើយតបបានសំណូមពរការងារបច្ចុប្បន្ននេះផងដែរ ៕
