ខេត្តកំពត ៖ នៅមុននៃពិធីបុណ្យសមុទ្រលើកទី៨ ជុំទី២ នៅខេត្តកំពត ចាប់ផ្តើមដំណើរការមកដល់។ ដើម្បីញ៉ាំងឲ្យព្រឹត្តិការណ៍នៃពិធីបុណ្យទេសចរណ៍ដ៏ធំនេះកាន់តែមានភាពទាក់ទាញនិងប្លែងអារម្មណ៍ និងមានភាពសប្បាយរីករាយបន្ថែមទៀតនោះ វិថីម្ហូបអាហារនិងសមិទ្ធផលទេសចរណ៍ថ្មីចំនួនបីត្រូវបានសម្ភោធដាក់ឲ្យប្រើប្រាស់ជាផ្លូវការក្នុងបរិយាកាសសប្បាយរីករាយ ។
ពិធីនេះបានធ្វើឡើងនៅរសៀលថ្ងៃទី ១៨ ខែធ្នូ ឆ្នាំ ២០១៩ ក្រោមវត្តមានឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងឯកឧត្តម ជាវ តាយ អភិបាលខេត្តកំពតបានចូលរួមជាអធិបតី។
ថ្លែងនៅក្នុងពិធីនោះ ប្រធានមន្ទីរទេសចរណ៍ខេត្ត លោកសយ ស៊ីណុល បានលើកឡើងថា មន្ទីរទេសចរណ៍ខេត្ត សហការជាមួយរដ្ឋបាលក្រុងកំពត ក្រោមការឧបត្ថមគាំទ្រពី ក្រសួងទេសចរណ៍និង រដ្ឋបាលខេត្ត ព្រមទាំងការចូលរួមពីភាគីពាក់ព័ន្ធនានាបានរៀបចំពិធីដាក់ឲ្យដំណើរការនូវវិថីម្ហូបអាហារខេត្តកំពត អមដោយការបើកឲ្យប្រើប្រាស់ផលិតផលទេសចរណ៍ចំនួនបីប្រភេទរួមមាន ទី១. កញ្ចប់ខ្សែទស្សនៈកិច្ចខេត្តកំពត, ២.សេវារ៉ឺម៉កកង់ទេសចរណ៍ និងទី៣. ម្ហូបអាហារប្រចាំខេត្តពីរប្រភេទ (សម្លការីត្នោតរស់ជាតិធុរេន និងញ៉ាំសារ៉ាយសមុទ្រម្រេចខ្ចី) ។
លោកប្រធានបានបន្តថា សម្រាប់ពិធីបុណ្យសមុទ្រឆ្នាំនេះ ភ្ញៀវទេសចរ អាចទៅទស្សនា តាមរមណីយដ្ឋាន និងគោលដៅទេសចរណ៍ចំនួន ១៧កនែ្លង សហគមន៍ទេសចរណ៍ ៤កនែ្លង និងផលិតផលថ្មីៗមួយចំនួនទៀត ។ ទេសចរណ៍ ក៏អាចរកសេវាកម្មផ្សេងៗដែលសរុបទាំងអស់មានចំនួន ៥៤៧កន្លែង ក្នុងនោះ សេវាស្នាក់នៅមានចំនួន ២៦៤កន្លែង សណ្ឋោគារចំនួន១៥កន្លែងស្មើនឹង ៩៦៩បន្ទប់ ផ្ទះសំណាក់ចំនួន ២៤៩កន្លែងស្មើនឹង ២៦០១បន្ទប់ ។ សេវាម្ហូបអាហារចំនួន ១៩៣កន្លែង និងកន្លែងកម្សាន្តសម្រាប់មនុស្សពេញវ័យ ចំនួន ៤៤កន្លែង ម៉ាស្សាសុខភាពចំនួន ២៦កន្លែង សេវាទូកដឹកភ្ញៀវទេសចរណ៍ចំនួន ១៦កន្លែង ការីទេសចរណ៍ចំនួន ៤កន្លែង មគ្គុទ្ទេសទេសចរណ៍ចំនួន ១៣៩នាក់ ក្នុងនោះមគ្គុទ្ទេសសហគមន៍ចំនួន ៤២នាក់ ។
ពិសេសជាងនេះទៅទៀត សម្រាប់ពិធីបុណ្យសមុទ្រមានកម្មវិធីសប្បាយជាច្រើនទៀតដូចជា ទស្សនាការសម្តែងសិល្បះ និងរបាំប្រពៃណីល្បីៗ ល្ខោនបាសាក់ របស់ម្ចាស់ស្រុក និងការសម្តែងសិល្បះរបស់ភ្ញៀវអន្តរជាតិ ការរាំលេងកម្សាន្តជុំគ្នា ការដើរទស្សនា និងទិញរបស់របរប្រើប្រាស់ផ្សេងៗ ទទួលទានម្ហូបអាហារឆ្ងាញ់ៗរបស់អ្នកស្រុកកំពតនៅវិថីម្ហូបអាហារ មើលការបាញ់កាំជ្រួចដ៏អស្ចារ្យ ដែលមានតម្លៃដល់ជាងមួយម៉ឺនដុល្លា ការប្រណាំងកង់ ប្រណាំងម៉ូតូទឹក រត់ប្រណាំង ការប្រកួតលើកទម្ងន់ស្វែងរកបុរសខ្លាំង ពិសេសការប្រកួតប្រដាល់ជើងឯក ដែលមានកីឡាករមេដាយមាសល្បីៗ របស់កម្ពុជា និងកីឡាករអន្តរជាតិ មកពី ថៃ ឥណ្ឌា អ៊ីរ៉ង់ ចិន បារាំង អូស្ត្រាលី ដែលការប្រកួតប្រដាល់ធ្វើឡើងរៀងរាល់ល្ងាច នៅតាមដងព្រែកក្បែរសាលាខេត្តកំពត ៕
