ខេត្តសៀមរាប ៖ ម្ចាស់ការដ្ឋានបូមខ្សាច់ដែលរំលោភបំផ្លាញស្ទឹង ហើយមិនព្រមចេញមុខមកដោះស្រាយ លោកឃឹម ហ្វីណង់ អភិបាលស្រុកបន្ទាយស្រី បានឱ្យដឹងថា ថ្មីៗនេះរកឃើញការដ្ឋានបូមខ្សាច់ចំនួន៥កន្លែង និងនៅមានផ្សេងទៀតក្នុងចំណោម ៥ មានការដ្ឋានបូមខ្សាច់ ២កន្លែង ដែលបានរំលោភ បំពានយ៉ាងធ្ងន់ធ្ងរ ដោយបិទមុខស្ទឹងបូមយកខ្សាច់រួចចាក់បង្ហូរទឹក ភ ក់ កករ ចូលទៅក្នុងស្ទឹងវិញ ។
មួយវិញទៀត មានការចាក់លុបធ្វើផ្លូវឆ្លងស្ទឹងដោយខុសច្បាប់ ដែលមិនបានដាក់លូតាមស្តង់ដាបច្ចេកទេស ធ្វើឱ្យមុខទឹករួមតូច ។ លក្ខខណ្ឌអនុញ្ញាតបច្ចេកទេស អនុវត្តខ្លួនភាគច្រើន ដែលខុសប្លែកពីគ្នាទីតាំងការដ្ឋានត្រូវបានរំកិលពីក្នុងស្ទឹង មកនៅជាប់មាត់ស្ទឹង ដោយមិនមានអាជ្ញាប័ណ្ណ ហើយយកលេះ ថា ជួយស្តារស្ទឹង តែធ្វើសកម្មភាពអស់រយះពេលជាង ២ឆ្នាំមកហើយ ។
នៅព្រឹកថ្ងៃទី១៩ ខែធ្នូ ឆ្នាំ២០១៩ នេះលោក ឃឹម ហ្វីណង អភិបាលស្រុកបន្ទាយស្រី បានបញ្ជាក់ទៀតថា ម្ចាស់ការដ្ឋានបូមខ្សាច់ចំនួនពីរ ដែលកំពុងរំលោភបំផ្លាញស្ទឹង យើងទុកឱកាសអោយចូលខ្លួនមកដោះស្រាយ ។
- ទី១ ត្រូវស្តារភក់ក្នុងស្ទឹងចេញឡើងវិញអោយស្អាតដូចដើម។
- ទី២ ត្រូវរៀបចំធ្វើយ៉ាងណាក៏ដោយ អោយច្រាំងស្ទឹងមានទម្រង់ដូចដើមវិញ។
- ទី៣ ទោះពេលនេះកំពុងគេចខ្លួនក៍ដោយ បើមិនដូច្នេះទេ នឹងអាចរឹបអូសគ្រឿងចក្រ ហើយកសាងសំណុំរឿងបញ្ជូនទៅតុលាការ ។
- ទី៤ ទោះបីចូលខ្លួនមកដោះស្រាយ ក៍អាជីវកម្មបូមខ្សាច់នេះ ត្រូវតែបិទជាស្ថាពរ ។
លោកអភិបាលបន្តទៀតថា ទឹកនៅក្នុងកំណាត់ស្ទឹងតាស៊ូ (ដៃស្ទឹងសៀមរាប) រាប់សិបគីឡូម៉ែត្រហូរឆ្លងកាត់៣ឃុំ ត្រូវបានរងផលប៉ះពាល់យ៉ាងធ្ងន់ធ្ងរ ៖ ទឹកឡើងល្អក់(ខ្ទុះ)មិនអាចប្រើប្រាស់បាន ត្រីមិនអាចរស់នៅបាន គោក្របី ក៏មិនអាចផឹកទឹកនេះបានឡើយ ។
រដ្ឋបាលស្រុកនឹងបន្តធ្វើការជាមួយមន្ទីររ៉ែនិងថាមពល ចុះពិនិត្យការដ្ឋានដែលនៅសេសសល់ផ្សេងទៀត មុននឹងឈានទៅដល់ចំណាត់ការតាមផ្លូវច្បាប់ក្នុងពេលឆាប់ៗ ។ ខាងមុខនេះនឹងជម្រុញឱ្យមានការពិចារណាទៅលើសុពលភាពអាជ្ញាប័ណ្ណបូមខ្សាច់ ទូទាំងស្រុកឡើងវិញផងដែរ ។
សូមបញ្ជាក់ផងដែរថា ទីតាំងបូមខ្សាច់ស្ថិតនៅស្រុកបន្ទាយស្រី ជាច្រើនកន្លែងនេះ បានកើតមានតាំងពីជំនាន់ អភិបាលស្រុកមុនៗមកម្ល៉េះ ខ្លះមានអាយុកាលជិត១០ឆ្នាំមកហើយ ។
ទោះបីលោកអភិបាល មិនទាន់បង្ហាញឈ្មោះ ក្រុមហ៊ុន ឬម្ចាស់ការដ្ឋានបូមខ្សាច់ទាំងនោះ ប៉ុន្តែក្នុងតំណែងអភិបាលស្រុកថ្មីនេះ ប្រជាពលរដ្ឋ៣ឃុំដែលរងផលប៉ះពាល់ រួមទាំងប្រជាពលរដ្ឋក្នុងស្រុកបន្ទាយស្រីទាំងមូល បង្ហាញភាពជឿជាក់ក្នុងការទប់ស្កាត់ និងមិនឱ្យម្ចាស់អាជីវកម្មណាម្នាក់ទន្រ្ទានបំផ្លាញធនធានធម្មជាតិបានទៀតឡើយ ៕
