ខេត្តព្រះសីហនុ ៖ មានករណីអគ្គីភ័យបានឆាបឆេះផ្ទះប្រជាពលរដ្ឋ និងតូបលក់ទំនិញជាច្រើន បណ្តាលឲ្យរងការខូចខាតយ៉ាងដំណំ ហេតុការណ៍ខាងលើនេះកើតឡើងនៅវេលាម៉ោង៤:៣០នាទីទៀបភ្លឺ ត្រូវនឹងព្រឹកថ្ងៃទី២០ ខែធ្នូ ឆ្នាំ២០១៩ នៅចំណុចខាងលិចស្ពានសេតេ ចម្ងាយ១០០ម៉ែត្រ ស្ថិតក្នុងភូមិ០២ សង្កាត់០៣ ក្រុង/ខេត្តព្រះសីហនុ ។
សមត្ថកិច្ចបានបញ្ជាក់ថា ភ្លាមៗនោះសមត្ថកិច្ចបានចេញរថយន្តពន្លត់អគ្គីភ័យជាច្រើនគ្រឿង ក្នុងនោះរួមមាន រថយន្តពន្លត់អគ្គីភ័យរបស់ក្រសួងមហាផ្ទៃ រថយន្តពន្លត់អគ្គីភ័យរបស់កងរាជអាវុធហត្ថ និងរថយន្តពន្លត់អគ្គីភ័យរបស់កំពង់ផែស្វ័យយ័ត្ន ដោយចូលរួមសហការអន្តរាគមន៍ពន្លត់ឱ្យអគ្គីភ័យរលត់ទៅវិញទាន់ពេលវេលា ។
បច្ចុប្បន្ន ករណីអគ្គីភ័យខាងលើបានរលត់ទៅវិញទាំងស្រុងហើយ និងមិនទាន់ដឹងថាបណ្តាលមកពីមូលហេតុអ្វីនៅឡើយទេ ។ ក្រៅពីឆេះដំបូលផ្ទះ និង ខូចខាតសម្ភារៈមួយចំនួន ឃើញថាមានមនុស្សរងគ្រោះ និង បណ្តាលឱ្យឆេះរាលដាលដល់ផ្ទះប្រជាពលរដ្ឋក្បែរនោះឡើយ ។
សូមបញ្ជាក់ថា ដោយយោងទៅតាមករណីអគ្គីភ័យបានកើតឡើងយ៉ាងដូច្នេះ អគ្គិសនីខេត្តព្រះសីហនុសូមធើ្វការផ្អាកការផ្គត់ផ្គង់ចរន្តអគ្គិសនីបណ្តោះអាសន្ននៅបន្ទប់ភ្លើងលេខS33 មូលហេតុដោយសារមានអគ្គីភ័យឆាបឆេះលំនៅដ្ឋានរបស់ប្រជាពលរដ្ឋ ដែលបណ្តាលឲ្យដាច់ចរន្តអគ្គីសនីនៅតំបន់មួយចំនួនដែលមានទីតាំងស្ថិតនៅ ភូមិ០២ សង្កាត់លេខ០៣ ក្រុងព្រះសីហនុ ខេត្តព្រះសីហនុ ។ ក្រុមការងារបច្ចេកទេស បានចូលរួមជួយពន្លត់អគ្គីភ័យ រៀបចំប្រព័ន្ធខ្សែបណ្តាញ និងភ្ជាប់ចរន្តអគ្គិសនីជូនអតិថិជនឲ្យមានចរន្តប្រើប្រាស់ឡើងវិញវេលាម៉ោង ០៦:៣៥ នាទីព្រឹក ។
អាស្រ័យហេតុនេះ សូមសម្តេច ទ្រង់ ឯកឧត្តម លោកជំទាវ អ្នកឧកញ៉ា លោកលោកស្រី មេត្តាជ្រាបជាព័ត៌មាន ។
