ខេត្តកំពត ៖ នាពេលបច្ចុប្បន្ន បាននឹងកំពុងទាក់ទាញភ្ញៀវទេចរណ៍ជាតិ និងអន្តរជាតិជាច្រើនមកកម្សាន្ត ហើយរៀងរាល់ថ្ងៃឈ ប់សម្រាកចុងសប្តាហ៍ ឬ ថ្ងៃបុណ្យទានផ្សេងៗ ក្រុងកំពតមានសេវាស្នាក់នៅសម្រាប់ទទួលភ្ញៀវទេសចរណ៍ពុំគ្រប់គ្រាន់ល្អប្រសើរនៅឡើយទេ ។
ក្រុងកំពតទទួលបានជ័យលាភីទីក្រុងទេចរណ៍ស្អាតអាស៊ានលើកទី២ ឆ្នាំ២០២០ នាពេលខាងមុខនេះ បើទោះជាយ៉ាងនេះក្តី រដ្ឋមន្ត្រីក្រសួងទេសចរណ៍ថា ទីក្រុងកំពតគួររៀបចំ និងអភិវឌ្ឍន៍ជាទីក្រុងទេសចរណ៍បេតិកភណ្ឌវប្បធម៌ ។
ថ្លែងក្នុងសិក្ខាសាលាអបអរសាទរពិធីបុណ្យសមុទ្រលើកទី៨ ក្រោមប្រធានបទ “ទីក្រុងស្អាត ឆ្នេរល្អ ទេសចរណ៍រុងរឿង” អមជាមួយពិធីប្រគល់ប័ណ្ណ និងលិខិតសរសើរដល់មូលដ្ឋានអាជីវកម្មទេសចរណ៍គំរូតំបន់ឆ្នេរសមុទ្រកម្ពុជា នៅព្រឹកថ្ងៃទី ១៩ ខែធ្នូ ឆ្នាំ២០១៩ នៅខេត្តកំពត ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា ក្រុងកំពតបានជាប់ជ័យលាភីជាទីក្រុងទេសចរណ៍ស្អាតអាស៊ាន លើកទី២ ដែលពានរង្វាន់នេះនឹងត្រូវប្រគល់ឲ្យក្នុងវេទិការទេសចរណ៍អាស៊ាន២០២០ ដែលនឹងធ្វើឡើងនៅទីក្រុងបានដាស៊េរីបេហ្គាវ៉ាន់ ប្រទេសព្រុយណេ នៅខែមករា ឆ្នាំ២០២០ខាងមុខនេះ ។
ឯកឧត្តមរដ្ឋមន្រ្តីបានបន្តថា បើទោះជាក្រុងកំពតទទួលបានជ័យលាភីទីក្រុងទេសចរណ៍ស្អាតអាស៊ានក៏ពិតមែន ប៉ុន្តែអាជ្ញាធរខេត្ត ក្រុង មន្ត្រីជំនាញ និងអ្នកពាក់ព័ន្ធ គួរធ្វើយ៉ាងណារៀបចំ និងអភិវឌ្ឍន៍ទីក្រុងកំពត ជាទីក្រុងទេសចរណ៍បេតិកភណ្ឌវប្បធម៌ មិនធ្វើការអភិវឌ្ឍន៍ដោយគ្មានការអភិរក្សនោះទេ ការធ្វើបែបនេះ ដើម្បីឆ្លើយតបទៅនឹងចក្ខុវិស័យរបស់រាជរដ្ឋាភិបាលដែលបានកំណត់ខេត្តកំពត ជា “គោលដៅទីក្រុងទេសចរណ៍បេតិកភណ្ឌវប្បធម៌ និងកសិទេសចរណ៍តំបន់ឆ្នេរ” ។
នៅក្នុងឱកាសនោះដែរ ឯកឧត្តមបណ្ឌិតក៏បានបញ្ជាក់ដែរថា ប្រធានបទនៃបុណ្យសមុទ្រ “ទីក្រុងស្អាត ឆ្នេរល្អ ទេសចរណ៍រុងរឿង” ក៏បានគូសបញ្ជាក់កាន់តែច្បាស់ នូវតួនាទីរបស់វិស័យទេសចរណ៍ ដើម្បីរក្សាតុល្យភាពរវាងតម្រូវការប្រើប្រាស់ធនធានធម្មជាតិតំបន់ឆ្នេរ និងតម្រូវការអភិវឌ្ឍសេដ្ឋកិច្ចសង្គម ដោយឈរលើទស្សនៈទាន “អភិរក្សដើម្បីអភិវឌ្ឍ អភិវឌ្ឍគាំពារដល់កិច្ចអភិរក្ស” ផងដែរ ។
ជាក់ស្តែង យោងតាមលទ្ធផលការប្រឡងប្រណាំងទីក្រុងស្អាតថ្នាក់ជាតិលើកទី១ និងលើកទី២ សុទ្ធតែបានសបញ្ជាក់រួចទៅហើយនូវស្មារតីចូលរួមយ៉ាងសកម្ម របស់រដ្ឋបាលខេត្តកំពត ក្នុងកិច្ចការងារអភិរក្ស អភិវឌ្ឍន៍ និងថែរក្សាបរិស្ថានជារួមនៅក្នុងក្រុងកំពត ។
នៅក្នុងឆ្នាំ២០១៩នេះ ខេត្តកំពតទទួលបានភ្ញៀវទេសចរណ៍អន្តរជាតិប្រមាណ ១៨០.៤៦៣នាក់ កើនឡើង៧,៥៩% ធៀបនឹងឆ្នាំ២០១៨ ។ ភ្ញៀវទេសចរណ៍ជាតិប្រមាណ ១.៤៨៤.៥៣៩នាក់ កើនឡើង១,៥៦%ធៀបនឹងឆ្នាំ២០១៨ ។
សូមបញ្ជាក់ថា អង្គសិក្ខាសាលានេះចូលរួមជាអធិបតីផងដែរពីសំណាក់ ឯកឧត្តមជាវ តាយអភិបាលខេត្ត និងជាសមាជិក សមាជិកា ពីប្រតិបត្តករណ៍ទេសចរណ៍ជាច្រើនរយនាក់ ។
