ខេត្តបន្ទាយមានជ័យ ៖ នារសៀលថ្ងៃសុក្រ ៩រោច ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹង ថ្ងៃទី២០ ខែធ្នូ ឆ្នាំ២០១៩ នៅទីស្នាក់ការប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិក្រុងប៉ោយប៉ែត មានការរៀបចំពិធីផ្លាស់ប្តូរមុខតំណែងនាយប៉ុស្តិ៍ ក្រោមអធិបតីភាព ឯកឧត្តម នាយឧត្តមសេនីយ៍ ឃុន សំបូរ អគ្គនាយករង នៃអគ្គនាយកដ្ឋាននគរបាលអន្តោប្រវេសន៍ នៃក្រសួងមហាផៃ្ទ ដោយមានការចូលរួមពី ឯកឧត្តម ង៉ោ ម៉េងជ្រួន អភិបាលរង នៃគណៈអភិបាលខេត្តបន្ទាយមានជ័យ និង លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ ។
ឯកឧត្តម ឧត្តមសេនីយ៍ទោ ស៊ឹម សំអាត គណៈបញ្ជាការរង ទិសយោធភូមិភាគទី៥ នគរបាលជាតិ លោក ឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងមានសមត្ថកិច្ចថៃអញ្ជើញមកចូលរួមផងដែរ ។ ព្រមទាំង ឯកឧត្តម លោកជំទាវ លោក លោកស្រី ដែលអញ្ជើញមកពី បណ្ដាក្រសួងនានា និងមន្ទីរជុំវិញសាលាខេត្តបន្ទាយមានជ័យ និងអាជ្ញាធរដែនដីក្រុងប៉ោយប៉ែត ជាច្រើនអ្នកទៀត ។
យោងតាមសេចក្តីប្រកាសរបស់ក្រសួងមហាផ្ទៃលេខ ១២៦៨៤ ប្រ.ក ថ្ងៃអង្គារ ៦រោច ខែមិគសិរ ឆ្នាំកុរឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៧ ខែធ្នូ ឆ្នាំ២០១៩ ដែលចុះហត្ថលេខាដោយ សម្ដេចក្រឡាហោម ស ខេង ឧបនាយករដ្ឋមន្ត្រី និង ជារដ្ឋមន្ត្រីក្រសួងមហាផ្ទៃ បានសម្រេចផ្ទេរភារៈកិច្ច និងតែងតាំងមុខតំណែងនគរបាលជាតិ នៃអគ្គនាយកដ្ឋានអន្តោប្រវេសន៍ ដែលមានលោកឧត្តមសេនីយ៍ត្រី អ៊ី ចំរើន អត្តលេខ៥៨៥៩១ ពីនាយប៉ុស្តិ៍នគរបាលច្រកទ្វារព្រំដែនអន្តរជាតិអូរយ៉ាដាវ នៃនាយកដ្ឋានច្រកទ្វារទី២ ទៅជានាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត នៃនាយកដ្ឋាន ច្រកទ្វារទី ១ ហើយ លោកវរសេនីយ៍ឯក ខឹម ចិត្ត្រា អត្តលេខ ២០៧៥៧ ពីនាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត នៃនាយកដ្ឋានច្រកទ្វារទី១ ទៅជានាយប៉ុស្តិ៍នគរបាលច្រកទ្វារព្រំដែនអន្តរជាតិ អូរយ៉ាដាវ នៃនាយកដ្ឋានច្រកទ្វារទី២ ។
សូមបញ្ជាក់ថា លោក ខឹម ចិត្ត្រា ត្រូវបានប្រកាសទទួលមុខតំណែងជានាយប៉ុស្តិ៍នគរបាលច្រកទ្វារ អន្តរជាតិប៉ោយប៉ែត នៃនាយកដ្ឋានច្រកទ្វាទី១ នៃអគ្គនាយកដ្ឋានអន្តោប្រវេសន៍ ជំនួសលោកឧត្តមសេនីយ៍ទោ ស៊ឹម សំអាត កាលពីរសៀលថ្ងៃទី១៧ ខែមករា ឆ្នាំ២០១៩កន្លងទៅ បើគិតរយៈពេល ដឹកនាំវិញ មិនបានមួយឆ្នាំពេញលេញនៅឡើយទេ ។ ក្រោយពីលោកវរសេនីយ៍ឯក ខឹម ចិត្ត្រា ឡើងអាន របាយការណ៍ អំពីសកម្មភាពដែលលោកបានដឹកនាំរយៈកាលកន្លងមក ។
លោកឧត្តមសេនីយ៍ត្រី អ៊ី ចំរើន ដែលទើបតែឡើងជានាយប៉ុស្ដិ៍ថ្មី បានឡើងប្តេជ្ញាចិត្តដោយលោកបាន បេ្តជ្ញាថា នឹងអនុវត្តន៍យ៉ាងម៉ឹងម៉ាត់នូវបទបញ្ជារបស់ថ្នាក់លើ ពង្រឹងសាមគ្គីភាពផ្ទៃក្នុងរបស់អង្គភាពឱ្យបានរឹងមាំ សហការជាមួយស្ថាប័ននានាឱ្យបានល្អ និងបង្កើនការទំនាក់ទំនងជាមួយភាគីថៃ ឱ្យកាន់តែល្អប្រសើរថែមទៀត ។
ក្នុងការប្រកាសតែងតាំងមុខតំណែង នាយប៉ុស្តិ៍ថ្មី ឯកឧត្ដម នាយឧត្តមសេនីយ៍ ឃុន សំបូរ អគ្គនាយករង នៃអគ្គនាយកដ្ឋានអន្តោប្រវេសន៍ បានមានប្រសាសន៍ផ្ដាំផ្ញើទៅដល់ លោកនាយប៉ុស្តិ៍ទាំងពីរ ឲ្យមានការយកចិត្តទុកដាក់ និងខិតខំធ្វើការងារ ការផ្លាស់ប្ដូរទីកន្លែងការងារវាជាគោលការណ៍របស់ថ្នាក់ដឹកនាំ គឺការផ្លាស់ប្ដូរដើម្បីយកបទពិសោធន៍ការងារ ហើយការផ្លាស់ប្ដូរមុខតំណែង ពីកន្លែងមួយទៅកន្លែងមួយ គឺជាការងារដូចគ្នានោះទេ វាសំខាន់គឺឋិតនៅលើខ្លួនយើង ផ្ដល់តម្លៃឲ្យការងារពីកន្លែងនីមួយៗ ហើយ ឯកឧត្តម ក៏បានបញ្ជាក់ផងដែរថា សូមខ្លួនឯងត្រូវគិតថា យើងជាអ្នកណា និងត្រូវអនុវត្តន៍ការងារអ្វីខ្លះដើម្បីបំរើប្រជាពលរដ្ឋ និងមាតុភូមិ សំខាន់ត្រូវស្គាល់ថា ខ្លួនយើងជាអ្វី៕
