រាជធានីភ្នំពេញ ៖ នៅយប់ថ្ងៃទី២៣ ខែធ្នូ ឆ្នាំ២០១៩ មានករណីបាញ់តដៃគ្នារវាងជនសង្ស័យ និងកម្លាំងការិយាល័យ គ្រឿងញៀន ក៦ ជាច្រើនគ្រាប់តែមិនបណ្តាលឲ្យមានរងរបួសនោះទេ ទីតាំងកើតហេតុនៅតាមបណ្តោយលេខ៣១៥ ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ប្រភពពីកម្លាំងការិយល័យគ្រឿងញៀន ក៦ បានឲ្យដឹងថា មុនពេលកើតហេតុ គឺកម្លាំងបានតាមមុខសញ្ញា ៤ ទៅ៥នាក់ ចេញពីម្តុំពេទ្យលោកសង្ឃកំពុងតែតាមដាន ជនសង្ស័យក៏ដឹងខ្លូន បានជិះម៉ូតូគេចពីកម្លាំងតាមផ្លូវ៥៩៨ បត់មកផ្សារមាន់អាំង លុះបត់បានបន្តិចមានការជិះប្រដេញពីកម្លាំងនគរបាលផង ជនសង្ស័យបានបត់ម៉ូតូចូលក្នុងផ្ទះ រួចដកកាំភ្លើងបាញ់មកលើកម្លាំងនគរបាលជាច្រើនគ្រាប់ តែមិនត្រូវ ហើយកម្លាំងនគរបាលបានរត់គេចចេញពីគ្រាប់កាំភ្លើង រីឯជនសង្ស័យបានរត់ចូលក្នុងផ្ទះ ក្រោយមកត្រូវបានកម្លាំងការិយាល័យគ្រឿងញៀន ក៦ ក៏បានហៅខាងកម្លាំងខណ្ឌទួលគោក មកជួយឡោមព័ទ្ធចាប់បាន២នាក់ ដកហូតបានអាវុធខ្លីមួយដើម និងសំបកគ្រាប់ដែលបាញ់រួចមួយចំនួនផងដែរ ។
ជនសង្ស័យដែលប្រើប្រាស់កាំភ្លើងបាញ់តដៃជាមួយសមត្ថកិច្ច ទី១ឈ្មោះ គិត ម៉េងលី ភេទប្រុស អាយុជាង២០ឆ្នាំ ទី២ឈ្មោះ មាស សីលា ហៅអាទាល់ ភេទប្រុសអាយុជាង២០ឆ្នាំ ។ ក្រោយកើតហេតុជនសង្ស័យទាំង២នាក់ ត្រូវកម្លាំងការិយាល័យ គ្រឿងញៀន ក៦ បញ្ជូនទៅសាកសួរនៅខាងការិយាល័យគ្រឿងញៀន ក៦ ៕
