ខេត្តកំពង់ចាម ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធកីឡាហែលទឹកកម្ពុជា បានក្រើនរំលឹកឲ្យក្រុមកីឡាករ -កីឡាការនីទាំងអស់ ត្រូវខិតខំហ្វឹកហាត់បន្ថែមទៀត ដើម្បីត្រៀមលក្ខណៈប្រកួតដណ្តើមយកមេដាយជូនជាតិរបស់យើង នៅពេលដែលកម្ពុជាធ្វើជាម្ចាស់ផ្ទះក្នុងការប្រកួត កីឡាស៊ីហ្គេម នៅឆ្នាំ២០២៣ ។
លោកទេសរដ្ឋមន្ត្រី ស៊ុន ចាន់ថុល បានក្រើនរំលឹកយ៉ាងដូច្នេះ នារសៀលថ្ងៃទី២៣ ខែធ្នូ ឆ្នាំ២០១៩ ក្នុងឱកាសដែលលោកបានអញ្ជើញជាអធិបតីភាព ប្រកាសបិទកម្មវិធី ប្រកួតកីឡារហែលទឹក ដណ្តើមពានរង្វាន់សម្តេចតេជោ ហ៊ុន សែន លើកទី៥ ឆ្នាំ២០១៩ នៅមណ្ឌលកីឡាហែលទឹកតេជោសែន ខេត្តកំពង់ចាម ។ ដោយមានការចូលរួមពី លោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម រួមទាំងកីឡាករ កីឡាការិនី ជាច្រើន ។
លោកទេសរដ្ឋមន្ត្រី ស៊ុន ចាន់ថុល ក៏បានសំណូមពរឲ្យមានការកសាងអាងហែលទឹក ឲ្យបានច្រើនគ្រប់ខេត្ត-ក្រុង ដើម្បីផ្តល់ជូនកីឡាករ-កីឡាការនី ធ្វើការហ្វឹកហាត់ ដើម្បីត្រៀមប្រកួតដណ្តើមមេដាយ ឲ្យបានច្រើនជូនជាតិរបស់យើងផងដែរ ។
សូមបញ្ជាក់ថា រយៈពេល៣ថ្ងៃចាប់តាំងពីថ្ងៃទី២១ ដល់ថ្ងៃទី២៣ ខែធ្នូ ឆ្នាំ២០១៩ មានកីឡាករ កីឡាការនី មកពីក្លឹបទាំង៨ ចូលរួមធ្វើការប្រកួតមានដូចជា ក្លឹបហែលទឹកក្រសួងសាធារណការ និងដឹកជញ្ជូន, ក្លឹបហែលទឹកក្រសួងមហាផ្ទៃ, ក្លឹបហែលទឹកក្រសួងសេដ្ឋកិច្ច និងហិរញ្ញវត្ថុ, ក្លឹបហែលទឹកនាគរាជកំពង់ចាម, ក្លឹបហែលទឹកក្រសួងព័ត៌មាន, ក្លឹបហែលទឹកខេត្តត្បូងឃ្មុំ, ក្លឹបហែលទឹកប្លូដូហ្វីនស្វីមមីង, និងក្លឹបប៉ារ៉ាអូឡាំពិកកម្ពុជា ។
ការប្រកួតប្រជែងលើវិញ្ញាសាចំនួន៤៧ រួមមាន ៖ វិញ្ញាសារហែលរបៀបសេរីផ្នែកបុរស-នារី ចម្ងាយ៥០ម៉ែត្រ, ១០០ម៉ែត្រ, និង២០០ម៉ែត្រ វិញ្ញាសាហែលរបៀបកង្កែប ផ្នែកបុរស-នារី ចម្ងាយ ៥០ម៉ែត្រ, ១០០ម៉ែត្រ, និង២០០ម៉ែត្រ វិញ្ញាសាហែលរបៀបផ្ងារបុរស-នារី ចម្ងាយ ៥០ម៉ែត្រ និង១០០ម៉ែត្រ និងវិញ្ញាសាហែលបណ្ដាក់របៀបសេរី បុរស-នារី ៤*១០០ម៉ែត្រ និងកីឡាបាល់ទឹកជាដើម ។ ចំណែកឯផ្នែកជនពិការមានវិញ្ញាសារបៀបសេរី ៥០ម៉ែត្រ និង១០០ម៉ែត្រ និងវិញ្ញាសាហែលរបៀបកង្កែប ចម្ងាយ ១០០ម៉ែត្រផងដែរ ៕
