ខេត្តស្វាយរៀង ៖ ដើម្បីធានាឱ្យបាននូវសុវត្ថិភាពចំណីអាហារ ជូនប្រជាពលរដ្ឋ និងមានសុខភាពល្អ មន្ត្រីសាខាកាំកុងត្រូលខេត្តស្វាយរៀង សហការជាមួយមន្ទីរពាណិជ្ជកម្មខេត្ត ដឹកនាំក្រុមការងារបន្តចុះត្រួតពិនិត្យមុខទំនិញជាច្រើនមុខ នៅក្នុងផ្សារប្រសូត្រ ស្រុកស្វាយទាប ខេត្តស្វាយរៀង រកឃើញទំនិញខូចគុណភាព និងហួសកាលបរិច្ឆេទប្រើប្រាស់ ដែលដាក់តាំងលក់នៅក្នុងផ្សារមួយនេះកាលពីព្រឹកថ្ងៃទី២៤ ខែធ្នូ ឆ្នាំ២០១៩ ។
បើតាមមន្ត្រីកាំកុងត្រូលខេត្តស្វាយរៀងបានឲ្យដឹងថា ការទទួលខុសត្រូវលើសុវត្ថិភាពម្ហូបអាហារជាការទទួលខុសត្រូវរួមគ្នា ទាំងស្ថាប័នជំនាញ ទាំងអ្នកនាំចូល អ្នកផលិត អ្នកចែកចាយ និងអ្នកទាំងអស់គ្នាជាអ្នកប្រើប្រាស់ផងដែរ ព្រោះសុខភាព គឺជាកត្តាចម្បងនៃភាពរស់រាន នៃជីវិតរបស់មនុស្ស ។
មន្ត្រីកាំកុងត្រូលបានអោយដឹងទៀតថា ក្រោយពីចុះធ្វើការត្រួតពិនិត្យនូវមុខទំនិញជាច្រើនមុខនៅក្នុងផ្សារប្រសូត្រ មន្ត្រីជំនាញយើងបានរកឃើញទំនិញខូចគុណភាពក្នុងនោះមាន ប័រ ទឹកកាពិក និងទឹកតៅហ៊ួសរុប ៨០កំប៉ុង យកទៅដុតកម្ទេចចោល ចំណែកអ្នកលក់ក៏បានយល់ព្រមបញ្ឈប់ការដាក់លក់ទំនិញដែលខូចគុណភាព ហួសកាលបរិច្ឆេទប្រើប្រាស់ ព្រោះពួកគេទាំងអស់គ្នា បានយល់ដឹងនូវផលប៉ះពាល់ដល់សុខភាពរបស់ប្រជាពលរដ្ឋ ។
មន្ត្រីកាំកុងត្រូលខេត្តស្វាយរៀង បានអំពាវដល់ប្រជាពលរដ្ឋទាំងអស់ សូមមានការប្រុងប្រយ័ត្នចំពោះការបរិភោគចំណីអាហារ ត្រូវពិនិត្យមើលស្លាកសញ្ញាកាលបរិច្ឆេទឲ្យបានច្បាស់លាស់ មុននឹងទិញយកទៅបរិភោគ ។
ជាពិសេសចំណីអាហារក្មេងៗនិយមបរិភោគ ត្រូវពិនិត្យមើលឲ្យបានត្រឹមត្រូវមុននឹងបរិភោគ ដើម្បីចូលរួមលើកកម្ពស់សុខុមាលភាពទាំងអស់គ្នា ហើយមន្ត្រីកាំកុងត្រូលនឹងបន្តចុះពិនិត្យទំនិញនៅតាមផ្សារនានា នៅក្នុងខេត្តស្វាយរៀងឲ្យបានជាបន្តបន្ទា ប់បន្ថែមទៀតផងដែរ ៕
