(ត្បូងឃ្មុំ)៖ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណអភិបាលខេត្តត្បូងឃ្មុំ ជាប្រធានក្រុមការងារយុវជនគណបក្សខេត្តនារសៀលថ្ងៃទី០៦ ខែមករា ឆ្នាំ២០២៣ បានអញ្ជើញជួបសំណេះសំណាល និងប្រគល់ថវិការបស់ឯកឧត្តមបណ្ឌិត ហ៊ុន ម៉ាណែតជូនដល់ក្រុមការងារគណបក្សឃុំ–សង្កាត់ទាំង ៦៤ និងសកម្មជនយុវជនសាខាបក្សភូមិទាំង៨៧៣ភូមិ នៅទូទាំងខេត្ត នៅមន្ទីរគណបក្សខេត្តត្បូងឃ្មុំ ស្ថិតនៅភូមិនិគមលើ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ ។ ដោយបានការចូលរួមពី ឯកឧត្តអនុប្រធានក្រុមការងារយុវជនគណបក្សខេត្ត សមាជិក សមាជិកា ក្រុមការងារយុវជនក្រុង/ស្រុក ឃុំ/សង្កាត់ និងអ្នកពាក់ព័ន្ធ ជាច្រើនរូប។
ឯកឧត្តមបណ្ឌិត ជាម ច័ន្ទសោភ័ណ សមាជិកគណ:កម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងារយុវជនគណបក្សប្រជាជនកម្ពុជាខេត្តត្បូងឃ្មុំ បានមានប្រសាសន៏លើកឡើង គោលការណ៍ និងគោលនយោបាយរបស់គណបក្ស ពង្រឹងរចនាសម្ព័ន្ធគណបក្ស រចនាសម្ព័ន្ធក្បាលម៉ាស៊ីនយុវជនគណបក្ស នយោបាយសតិអារម្មណ៍របស់មហាជន និងប្រជាជន ក្នុងស្ថានការណ៍ត្រៀមបោះឆ្នោតនាពេលខាងមុខ និងការអនុវត្តន៍ផែនការឆ្ពោះ ទៅរកការបោះឆ្នោតជ្រើសតាំងរដ្ឋសភា នីតិកាលទី ៧នាថ្ងៃទី២៣ ខែកក្កដា ឆ្នាំ ២០២៣ ខាងមុខនេះ។
ឯកឧត្តមប្រធានក្រុមការងារយុវជនគណបក្សខេត្ត បានពាំនាំនូវប្រសាសន៍ផ្តាំផ្ញើសួរសុខទុក្ខ ពីសំណាក់សម្តេចតេជោ ហ៊ុន សែននាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា ជាពិសេសឯកឧត្តម ហ៊ុន ម៉ាណែត ប្រធានយុវជនគណបក្សប្រជាជនកម្ពុជាថ្នាក់កណ្តាល ដែលតែងតែយកចិត្តទុកដាក់ ដល់យុវជន ដែលជាទំពាំងស្នងឬស្សី សម្រាប់ប្រទេសជាតិ។ឯកឧត្តមបានកោតសរសើរ ដល់យុវជនទាំងអស់ ដែលកន្លងមកបានខិតខំអនុវត្តន៍ការងារ តាមគោលមាគ៌ានយោបាយរបស់គណបក្ស សកម្មចូលរួមកការងារសង្គម ដែលធ្វើឱ្យគណបក្សប្រជាជនកម្ពុជាគ្រប់ថ្នាក់ គ្រប់ផ្នែក ទទួលយក និងកោតសរសើរ។
ឯកឧត្តមបណ្ឌិត ជាម ច័ន្ទសោភ័ណ ក៏បានសូមឱ្យយុវជនទាំងអស់ បន្តខិតខំរៀនសូត្រ ពង្រឹងនូវសតិអារម្មណ៍ និងសមត្ថភាពការងារចំណេះដឹងដើម្បីឱ្យក្លាយជាធនធានមនុស្សដ៏សំខាន់ សម្រាប់កសាងប្រទេសជាតិ។ ក្នុងឱកាសនោះដែរ ឯកឧត្តមប្រធានក្រុមការងារយុវជនគណបក្សខេត្ត ក៏បានប្រគល់ថវិការបស់ឯកឧត្តមបណ្ឌិត ហ៊ុន ម៉ាណែត ជូនដល់ក្រុមការងារគណបក្សឃុំ–សង្កាត់ទាំង ៦៤និងសកម្មជនយុវជនសាខាបក្សភូមិទាំង ៨៧៣ភូមិផងដែរ៕
