សមត្ថកិច្ចខេត្តព្រះវិហារ ចាប់ខ្លួនមេក្លោងជួញដូរគ្រឿងញៀនម្នាក់ ដកហូតបានថ្នាំញៀនប្រមាណ២០គីឡូក្រាម

ខេត្តព្រះវិហារ​​​ ៖ មេក្លោងជួញដូរគ្រឿងញៀនឆ្លងដែនម្នាក់ ត្រូវបានកម្លាំងមន្ទីរប្រឆាំងបទល្មើសគ្រឿងញៀន( ក១ ) នៃក្រសួងមហារផ្ទៃ សហការណ៍ជាមួយកម្លាំងការិយាល័យនគរបាល ប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តព្រះវិហារ បានចុះបង្ក្រាប រួមនិងចាប់យកវត្ថុតាងគ្រឿងញៀនចំនួន២០កញ្ចប់ធំ ។

ហេតុការណ៍ចុះបង្ក្រាបនេះ បានធ្វើឡើងកាលពីវេលាម៉ោង២ៈ២២នាទីរសៀល ថ្ងៃទី២៥ ខែធ្នូ ឆ្នាំ២០១៩ នៅចំណុចតំណាក់សេមាន់ ច្រកអានសេះ ស្ថិតក្នុងភូមិអានសេះ  ឃុំជាំក្សាន្ត ស្រុកជាំក្សាន្ត ខេត្តព្រះវិហារ ។

ប្រតិបត្តិការនេះ ដឹកនាំបញ្ជាបង្ក្រាប ពីលោកឧត្តមសេនីយ៍ត្រី អ៊ិន សុង នាយករង មន្ទីរប្រឆាំងបទល្មើសគ្រឿងញៀនក្រសួងមហាផ្ទៃ និងលោករវសេនីយ៍ទោ ជា សំអឿន នាយរងការិយាល័យ ( ក១ ) ក្រោមការសម្របសម្រួលពីលោក ទី សុវិនថាល់ ព្រះរាជអាជ្ញា នៃអយ្យការ អមសាលាដំបូងខេត្តព្រះវិហារផងដែរ។

មន្ត្រីមន្ទីរប្រឆាំងបទល្មើសគ្រឿងញៀន បានថ្លែងឲ្យដឹងថា ដោយអនុវត្តតាមបញ្ជាអគ្គស្នងការនគរបាលជាតិ នាយឧត្តមសេនីយ៍ នេត សាវឿន  អគ្គស្នងការរង ទទួលផែនប្រឆាំងគ្រឿង ញៀន នាយឧត្តមសេនីយ៍ ម៉ក់ ជីតូ  និងលោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន បានបញ្ជាកម្លាំងជំនាញមួយក្រុម ចុះស្រាវជ្រាវមុខសញ្ញាជួញដូរគ្រឿងញៀនឆ្លងដែន នៅក្នុងភូមិសាស្រ្តខេត្តព្រះវិហារ។

ជាលទ្ធផល នៅក្នុងប្រតិបត្ដិការនេះ កម្លាំងនគរបាលមន្ទីរប្រឆាំងបទល្មើសគ្រឿងញៀន បានឃាត់ខ្លួនជនសង្ស័យម្នាក់ ឈ្មោះ ពិន និស្សា ហៅ ខូច ភេទប្រុស អាយុ២៤ឆ្នាំ ជនជាតិខ្មែរ  រឹបអូសវត្ថុតាង សារធាតុញៀនប្រភេទមេតំហ្វេតាមីន (ICE) ចំនួន២០ដុំធំ មានទម្ងន់ប្រមាណ២០ គីឡូក្រាម ដែលជនសង្ស័យ បាននាំឆ្លងដែន ពីប្រទេសថៃ ចូលមកកម្ពុជា ។ លោកថា ខណៈនេះជនសង្ស័យ រួមជាមួយវត្ថុតាង បានបញ្ជូនទៅកាន់ ស្នងការដ្ឋាននគរបាលខេត្តព្រះវិហារ ដើម្បីកសាងសំណុំរឿង បញ្ជូនបន្តទៅតុលាការ ចាត់ការតាមនីតិវិធី ៕