ភ្នំពេញ ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃដំបូងនៃឆ្នាំ២០២០នេះ បានបង្ហាញនូវតួរលេខផ្លូវការ ដែលកត់តា្រដោយក្រសួង អំពីការនាំចេញកសិផលរបស់កម្ពុជា នៅឆ្នាំ២០១៩ កន្លងទៅនេះ ។
របាយការណ៍របស់លោករដ្ឋមន្ត្រីបានបញ្ជាក់ថា នៅឆ្នាំ២០១៩ ប្រទេសកម្ពុជាបាននាំចេញកសិផលទាំងផ្លូវការ និងមិនផ្លូវការសរុបចំនួនជិត ៧លានតោនទៅទីផ្សារក្រៅប្រទេស ក្នុងនោះការនាំចេញផ្លូវការមានចំនួនជិត ៥លានតោន និងមិនផ្លូវការជាង២លានតោន ។
ការនាំចេញផ្លូវការនៅឆ្នាំ២០១៩ កម្ពុជានាំចេញអង្ករបាន៦២ម៉ឺនតោន , ចំណិតដំឡូងមីក្រៀម-ស្រស់ ជាង៣លានតោន , ម្សៅដំឡូងមីជាង ៥ម៉ឺនតោន , គ្រាប់ស្វាយចន្ទី ជាង២០ម៉ឺនតោន , គ្រាប់ពោតជិត១២ម៉ឺនតោន , សណ្តែកសៀងជិត ៦ម៉ឺនតោន , ចេកជិត ១៦ម៉ឺនតោន , ផ្លែស្វាយជិត ៦ម៉ឺនតោន , ម្រេចជាង ៣ពាន់តោន និងផលដំណាំផ្សេងៗទៀតជិត ៣០ម៉ឺនតោន ។
ការនាំចេញស្រូវក្រៅផ្លូវការនៅឆ្នាំ២០១៩ កម្ពុជានាំចេញស្រូវក្រៅផ្លូវការទៅកាន់ប្រទេសវៀតណាម ចំនួនជាង២លានតោន តាមខេត្តជាប់ព្រំដែនដូចជា តាកែវ ព្រៃវែង ស្វាយរៀង កណ្តាល និងកំពត ។
ទីផ្សារសំខាន់ៗសម្រាប់កសិផលរបស់កម្ពុជារួមមាន ៖ ប្រទេសចិន អឺរ៉ុប អាស៊ាន ជប៉ុន អាមេរិក កូរ៉េ ឥណ្ឌា រុស្ស៊ី អារ៉ាប៊ីសាអូឌីត អូស្ត្រាលីជាដើម ៕
