(ត្បូងឃ្មុំ)៖ រដ្ឋបាលខេត្តត្បូងឃ្មុំ សហការជាមួយមន្ទីរវប្បធម៍ និងវិចិត្រសិល្បៈខេត្តត្បូងឃ្មុំ នាថ្ងៃទី១៥ ខែមីនា ឆ្នាំ២០២៣ បានប្រារព្ធពិធីអបអរសាទរទិវាវប្បធម៍ជាតិ ០៣មីនា ២០២៣ ក្រោមប្រធានបទ “យុវជនដើម្បីវប្បធម៍ជាតិ” ប្រព្រឹត្តិទៅក្រោមអធិបតីភាពលោកជំទាវ នី ចាន់ធីតា អភិបាលរងខេត្ត តំណាងឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ ដែលធ្វើឡើងនៅសាលប្រជុំកសាលាខេត្តត្បូងឃ្មុំ។
ក្នុងឳកាសនោះមានការសម្តែងរបាំជូនពររបស់ប្អូនៗនៃមន្ទីរវប្បធម៍ និងវិចិត្រសិល្បៈខេត្តត្បូងឃ្មុំ និងការសម្តែងចាប៉ីដងវែងរបស់លោកតាព្រឹទ្ធចារ្យ០២រូប ដែលជាមរតកមនុស្សរស់ នៅក្នុងខេត្តត្បូងឃ្មុំ ក៍ដូចជាផ្តល់ថវិកា និងថតរូបទុកជាអនុស្សាវរីយ៍ផងដែរ។
លោក កួ ហុក ប្រធានមន្ទីរវប្បធម៍ និងវិចិត្រសិល្បៈខេត្តត្បូងឃ្មុំ ឲ្យដឹងថា ការប្រារព្ធទិវាវប្បធម៌ជាតិ ៣មីនា រៀងរាល់ឆ្នាំ គឺជាគោលបំណងរបស់រាជរដ្ឋាភិបាលកម្ពុជា ក៏ដូចជាក្រសួងវប្បធម៌ និងវិចិត្រសិល្បៈ ដើម្បីរំឮកគុណូបការៈដ៏ឧត្តុងឧត្តម ចំពោះបុព្វបុរសខ្មែរដែលបានលះបង់សាច់ស្រស់ ឈាមស្រស់ កម្លាំងកាយ កម្លាំងបញ្ញាញាណ កសាង ប្រាសាទសិលាជាច្រើន ព្រមទាំងវត្ថុសិល្បៈ និងសិល្បៈទស្សនីយភាពគ្រប់ប្រភេទដ៏មានសក្តានុ ភាព វប្បធម៌ អរិយធម៌ និងអត្តសញ្ញាណជាតិតាំងពីសម័យមហានគរបវររុងរឿងនៃយើង។
លោក កួ ហុក ឲ្យដឹងទៀតថា ខេត្តត្បូងឃ្មុំ ជាខេត្តថ្មីទើបតែបង្កើតឡើងក៏ពិតមែនតែជាទឹកដីចំណាស់ជាតំបន់បុរេប្រវត្តិ មួយក្នុងចំណោមតំបន់បុរេប្រវត្តិសាស្ត្រសំខាន់ៗ ទូទាំងព្រះរាជាណាចក្រកម្ពុជាជាក់ស្ដែងយើង មាន៖ ស្ថានីយបុរេប្រវត្តិចំនួន៣៣កន្លែង, ប្រាសាទបុរាណចំនួន០៩កន្លែង, ទួលបុរាណចំនួន៥១កន្លែង, ស្រះបុរាណចំនួន១១កន្លែង, ទន្លេស្ងួតចំនួន០១កន្លែង, អណ្តូងបុរាណចំនួន០១កន្លែង, រមណីយដ្ឋានធម្មជាតិ និងប្រវត្តិសាស្ត្រចំនួន០២កន្លែង, សារមន្ទីរចំនួន០១កន្លែង, ប៉មចំនួន០៣កន្លែងនិងសិល្បៈមហាជនគ្រប់ទម្រង់ចំនួន១៨៨ក្រុម។
មានប្រសាសន៍នាឳកាសនោះ លោកជំទាវ នី ចាន់ធីតា អភិបាលរងខេត្តត្បូងឃ្មុំ បានលើកឡើងថា ជាការពិតណាស់ ប្រមុខរាជរដ្ឋាភិបាលនៃព្រះរាជាណាចក្រកម្ពុជា តែងតែយកចិត្តទុកដាក់ រៀបចំប្រារព្ធទិវាវប្បធម៌ជាតិ៣មីនា ជារៀងរាល់ឆ្នាំ ដើម្បីរំឮកគុណូបការៈ និងស្នាដៃដ៏វិសេសវិសាលនៃបុព្វបុរសយើង ដែលបានបន្សល់ទុកនូវមរតកវប្បធម៌ដ៏សម្បូរបែបដល់កូនចៅជំនាន់ក្រោយ ។
លោកជំទាវ អភិបាលរងខេត្ត បន្តថា ការប្រារព្ធទិវាវប្បធម៌ជាតិ ៣មីនានេះ ក៏ជាការជម្រុញការផ្សព្វផ្សាយ ការផ្ទេរចំណេះដឹងចំណេះធ្វើ ជំនាញ បច្ចេកទេស និងទេពកោសល្យវប្បធម៌ ក៏ដូចជាការក្រើនរំឮក បំផុសស្មារតី និងមនសិការ ដល់ប្រជាពលរដ្ឋទាំងអស់ ជាពិសេសយុវជនដែលជាទំពាំងស្នងឫស្សី មានកាតព្វកិច្ចក្នុងការថែរក្សាការពារ ឱ្យបានស្ថិតស្ថេរគង់វង្ស នូវវប្បធម៌ជាតិនិងវប្បធម៌ចម្រុះ របស់សហគមន៍ជនជាតិ ក្នុងព្រះរាជាណាចក្រកម្ពុជា ។
ជាចុងក្រោយ លោកជំទាវ នី ចាន់ធីតា អភិបាលរងខេត្ត បានធ្វើការកោតសរសើរម្តងទៀតដល់រដ្ឋបាលខេត្ត មន្ទីរវប្បធម៌និងវិចិត្រសិល្បៈ និងមន្ទីរអង្គភាពពាក់ព័ន្ធនានាដែលបានសហការរៀបចំទិវាវប្បធម៌ជាតិ៣មីនា និងស្មារតីរួមគ្នាបង្កើតព្រឹត្តិការណ៍វប្បធម៌នេះឡើង ដើម្បីលើកស្ទួយវឌ្ឍនភាពវប្បធម៌ជាតិ ក្នុងដំណាក់កាលថ្មីស្របនឹងពាក្យស្លោក “កម្ពុជាព្រះរាជាណាចក្រវប្បធម៌” “កម្ពុជាព្រះរាជាណាចក្រអច្ឆរិយ” ជាពិសេសគឺបាននឹងកំពុងជួយរក្សាបាននូវការអភិរក្សនិងការលើកតម្កើងតម្លៃវប្បធម៌ជាតិខ្មែរឱ្យបានឋិតថេរគង់វង្ស៕
