(ត្បូងឃ្មុំ)៖ នាព្រឹកថ្ងៃទី១០ ខែតុលា ឆ្នាំ២០២៣នេះ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ អញ្ជើញជួបសំណេះសំណាល ផ្តល់ការលើកទឹកចិត្ត ដល់ក្រុមការងារយុវជនបណ្តាញសង្គមខេត្តត្បូងឃ្មុំ ក្នុងឱកាសពិធីបុណ្យកាន់បិណ្ឌ–ភ្ជុំបិណ្ឌប្រពៃណីជាតិខ្មែរ ដែលដឹកនាំដោយលោកបណ្ឌិត សេង ជ័យវុធ នាយករដ្ឋបាលសាលាខេត្ត។
ក្នុងឳកាសនោះ ឯកឧត្តមបណ្ឌិត ជាម ច័ន្ទសោភ័ណ បានសំណេះសំណាលសួរសុខទុក្ខ និងថ្លែងការកោតសរសើរចំពោះយុវជនយុវនារីក្រុមការងារបណ្តាញសង្គមទាំងអស់ ដែលបានចូលរួមផ្សព្វផ្សាយ និងសូមបន្តផ្សព្វផ្សាយឲ្យកាន់តែផុសផុលបន្ថែមទៀត នូវរាល់ព័ត៌មានអភិវឌ្ឍន៍នានា សកម្មភាពថ្នាក់ដឹកនាំ និងសមិទ្ធផលជាច្រើនសន្ធឹកសន្ធាប់ដែលរាជរដ្ឋាភិបាលកម្ពុជា ពិសេសរដ្ឋបាលខេត្តត្បូងឃ្មុំ សម្រេចបានកសាងចេញជារូបរាងឡើងទាំងនាពេលកន្លងមក ក៍ដូចជាបន្តកសាងនាពេលបច្ចុប្បន្ន និងនៅអនាគតយ៉ាងច្រើនបន្ថែមទៀត។
ជាមួយគ្នានោះ ឯកឧត្តមបណ្ឌិត អភិបាលខេត្ត បានមានប្រសាសន៍លើកឡើងបង្ហាញប្រាប់ទៅកាន់ក្រុមយុវជន ឲ្យយល់កាន់តែច្បាស់ពី <<យុទ្ធសាស្តបញ្ចកោណ ដែលមាន៥ចំនុចជាសំខាន់រួមមានៈ កំណើន, ការងារ, សមធម៍, ប្រសិទ្ធភាព និងចីរភាព>> របស់រាជរដ្ឋាភិបាលកម្ពុជាអាណត្តិថ្មី ដែលមានសម្តេចបវរធិបតី ហ៊ុន ម៉ាណែត ជានាយករដ្ឋមន្ត្រី និង <<យុទ្ធសាស្រ្តអាទិភាពទាំង៥: មនុស្ស, ផ្លូវ, ទឹក, ភ្លើង និងបច្ចេកវិទ្យា>>។
ស្ថិតក្នុងឳកាសនោះដែរ ឯកឧត្តមណ្ឌិត ជាម ច័ន្ទសោភ័ណ បានលើកទឹកចិត្តដល់ប្អូនៗយុវជនទាំងអស់ឱ្យបន្តខិតខំរៀនសូត្រ និងចូលរួមវគ្គបណ្តុះបណ្តាលជំនាញខ្លីៗ ដើម្បីអភិវឌ្ឍន៍ខ្លួនឯងឱ្យក្លាយជាធនាធានមនុស្សដ៏ល្អសម្រាប់ប្រទេសជាតិ។
ជាពិសេសប្អូនៗក្រុមការងារបណ្តាញសង្គម ដែលប្រលងជាប់ថ្នាក់ទី១២ទាំងអស់ ឯកឧត្តមបណ្ឌិត បន្តលើកទឹកចិត្ត នឹងស្វែងរកអាហារូបករណ៍ផ្តល់ជូន បើស្វែងរកមិនបាន លោកបណ្ឌិត នឹងចេញថវិកាផ្ទាល់ខ្លួនរ៉ាង់រង ឲ្យប្អូនៗបន្តការសិក្សានៅថ្នាក់បរិញ្ញាបត្រដើម្បីជាអ្នកបន្តវេន ជាកោសិកាជាតិ ជាទំពាំងស្នងឬស្សីដ៍ល្អសម្រាប់សង្គមជាតិកម្ពុជា ជាពិសេសសម្រាប់ខេត្តត្បូងឃ្មុំតែម្តង។
ជាមួយគ្នានេះដែរ ឯកឧត្តមបណ្ឌិត ជាម ច័ន្ទសោភ័ណ បានផ្តល់កិត្តិយសថតរូបទុកជាអនុស្សាវរីយ៍ ព្រមទាំងផ្តល់ជូនថវិកាមួយចំនួនដល់ប្អូនៗយុវជន សម្រាប់ធ្វើបុណ្យជាមួយក្រុមគ្រួសារ ក្នុងឱកាសពីធីបុណ្យភ្ជុំបិណ្ឌប្រពៃណីជាតិខ្មែរយើងផងដែរ។
សូមបញ្ជាក់ថា៖ ក្រុមការងារយុវជនបណ្តាញសង្គមខេត្ត ដែលដឹកនាំដោយ លោកបណ្ឌិត សេង ជ័យវុធ នាយករដ្ឋបាលខេត្ត តែងតែចូលរួមយ៉ាងសកម្មក្នុងការផ្សព្វផ្សាយយ៉ាងផុសផុលរាល់សកម្មភាព និងការអភិវឌ្ឍន៍នានា របស់រាជរដ្ឋាភិបាលកម្ពុជា និងរដ្ឋបាលខេត្តត្បូងឃ្មុំ ដល់មហាជនទូទៅបានជ្រាប៕
