ខេត្តមណ្ឌលគិរី ៖ បន្ទាប់ពីក្រុមកាងារចម្រុះចុះសិក្សាស្វែងយល់ ជំហ៊ានដំបូងកាលពីថ្ងៃទី១០ ដល់ថ្ងៃទី១១ ខែមករា ឆ្នាំ២០២០ កន្លងទៅនេះ លទ្ធផលនៃការសិក្សាប្រភេទថ្ម គឺបានបង្ហាញថា ជាថ្មបាសាល់ដែលសេសសល់ពីកម្អែរភ្នំភ្លើង ដែលមានអាយុកាលដល់ទៅរាប់លានឆ្នាំឯណោះ ។
ក្រសួងបរិស្ថានកាលពីថ្ងៃទី១០ ខែមករា ឆ្នាំ២០២០ ដឹកនាំដោយលោក លឿង កេសារោ បានឱ្យដឹងថា ក្រោយពីការសិក្សា ក្រុមការងារមានគម្រោងរៀបចំបង្កើតជាតំបន់អភិរក្សបេតិកភណ្ឌ “ឡាំមេះ” ដើម្បីថែរក្សាសម្បត្តិជាតិ សម្បត្តិដូនតា និងជំនឿប្រពៃណីរបស់ជនជាតិដើមភាគតិចព្នង ដោយធ្វើការចុះបញ្ជីជាដីសាធារណៈរបស់រដ្ឋ និងបោះបង្គោលកំណត់ព្រំប្រទល់ឱ្យបានច្បាស់លាស់ ។ មន្ត្រីជំនាញនៅពេលនោះបានអះអាងថា ទីតាំងនោះក្រុមការងារបានពិនិត្យស្រាវជ្រាវលើតំបន់សសរថ្មធម្មជាតិជាច្រើនផ្ទាំង ស្ថិតនៅភូមិលេខ៥ (ឡាំមេះ) ឃុំប៊ូស្រា ស្រុកពេជ្រាដា ខេត្តមណ្ឌលគិរី ក្នុងភូមិសាស្រ្តតំបន់របៀងអភិរក្សជីវចម្រុះខេត្តមណ្ឌលគិរី ។ តាមការសិក្សាជំហានដំបូងមានអាយុកាលរាប់ពាន់ឆ្នាំ ។ ហើយថ្មមានមុខកាត់ចាប់ពី៤០សម ដល់៦០សម និងប្រវែងរហូតដល់ ២ម៉ែត្រ ដុះឡើងពីធម្មជាតិតាមចង្កេះភ្នំណាមលៀរ ដែលមើលទៅហាក់ដូចជាត្រូវបានគេលើកបន្ដុបលើគ្នាដូចរាងប្រាសាទបុរាណ ។
ក្នុងនោះកាលពីថ្ងៃទី១១ ខែមករា ឆ្នាំ២០២០ លោកសី ទួច ប្រធានមន្ទីរវប្បធម៌ និងវិចិត្រសិល្បះខេត្តមណ្ឌលគិរី បន្តចុះទៅសិក្សានៅទីតាំងនោះ ។ លោកថាវានៅមិនឆ្ងាយប៉ុន្មានពីទីរួមស្រុកពេជ្រាដានោះទេ ។ លោកថាពេលទៅដល់ទីតាំងខាងលើ លោកសង្កេតឃើញពីរុក្ខជាតិកម្រ ទឹកជ្រោះបីជាន់ សត្វព្រៃ ថ្មរាយប៉ាយ និងថ្មតម្រៀបគ្នា ហាក់មានអារម្មណ៍ព្រឺសម្បុរដែរ ។
លោកប្រធានមន្ទីរបញ្ជាក់សំដីអ្នកជំនាញថា ថ្មទាំងនោះបានសេសសល់ពីកម្អែរភ្នំភ្លើងដែលចុះត្រជាក់ ក្រោយការផ្ទុះកាលពីរាប់លានឆ្នាំមុន ។ លោកថា ផ្អែកទៅតាមការសួរនាំពីសហគមន៍ និងចាស់ទុំក្នុងភូមិឡាំមេះ បានបញ្ជាក់ថាទីតាំងខាងលើ ជាព្រៃដំណម (ព្រៃមិនសូវមានអ្នកហ៊ានចូល) ។ ប្រធានមន្ទីរដដែលថា ទីតាំងខាងលើ ជាមរតកធម្មជាតិអញ្ចឹងខាងមន្ទីរ លោកនឹងគាំទ្រដល់ក្រសួងបរិស្ថានក្នុងការអភិរក្សទីនោះ ។
ជាមួយគ្នានោះលោកគ្រើង តុលា ជាសមាជិកសហគមន៍ជនជាតិដើមក្នុងខេត្តមណ្ឌលគិរី ក៏ធ្លាប់លឺរឿងដំណាលពីចាស់ទុំ លើបារមីដ៏ស័ក្តសិទ្ធិ នៅទីតាំងថ្មបាសាល់នោះដែរ ។ លោកថានៅថ្ងៃ១២ ខែមករា នេះគណ:កម្មាធិការសហគមន៍៧ភូមិនៅក្នុងឃុំប៊ូស្រា បានប្រជុំពិភាក្សារៀបចំផែនការ ការពារថ្មធម្មជាតិនៅចំណុចអូរស្រា ឲ្យមានចេរភាព ប្រកបដោយគុណភាពថែមទៀតផង ។
គួបញ្ជាក់ឡើងវិញថា រឿងថ្មបាសាល់នេះ បានបង្កើតការចាប់អារម្មណ៍ខ្លាំង ក្រោយពេលដែលសហគមន៍តំបន់នេះ បានរាយការណ៍អំពីក្រុមជនជាតិខ្មែរ និងវៀតណាម មកលួចជីកយកទៅលក់នៅបរទេស ក្នុងតំលៃច្រើនពាន់ម៉ឺនដុល្លារហូតមកដល់ពេលនេះ គ្មានសេចក្តីរាយការណាបញ្ជាក់អំពីការស្រាវជ្រាវ ឈានទៅរកការឃាត់ខ្លួនជនសង្ស័យនៅឡើយ៕
