ត្បូងឃ្មុំ ៖ ដើម្បីសម្រួលដល់ការងារចុះមូលដ្ឋានទាំង២សង្កាត់ ក្នុងក្រុងសួង ខេត្តត្បូងឃ្មុំ របស់គណបក្សប្រជាជនកម្ពុជា គណៈកម្មាធិការគណបក្សខេត្តបានសម្រេចចាត់តាំងសមាសភាពក្រុមការងារមួយចំនួនបន្ថែមទៀតដោយក្នុងនោះសង្កាត់វិហារលួង មានអនុប្រធាន១៤ នាក់ សង្កាត់សួង ចំនួន ៤នាក់ ខណៈពិធីប្រកាសទទួលស្គាលបានធ្វើឡើងនៅថ្ងៃទី៣១ ខែឧសភា ឆ្នាំ ២០២៤ នៅស្នាក់ការគណបក្សប្រជាជនកម្ពុជា ក្រុងសួង ក្រោមអធិបតីភាព ឯកឧត្តមវេជ្ជបណ្ឌិត កែវ វណ្ណៈ ប្រធានក្រុមការងារចុះមូលដ្ឋានសង្កាត់សួង និងសង្កាត់វិហារលួង ។
បន្ទាប់ពីលោក ជា ណារ៉ុន អនុប្រធានគណបក្សប្រជាជនកម្ពុជាក្រុងសួង អាននូវសេចក្តីសម្រេចស្តីពីការ ចាត់តាំងសមាសភាពក្រុមការងារគណបក្សចុះមូលដ្ឋានក្រុងសួង ខេត្តត្បូងឃ្មុំ និងពិធីប្រគល់ទទួលសេចក្តីសម្រេច ឯកឧត្តមវេជ្ជបណ្ឌិត កែវ វណ្ណៈ បានមានប្រសាសន៍លើក ឡើងថា សមាសភាពក្រុមការងារនេះពិតជាមានសារៈសំខាន់ក្នុងការចុះបំពេញការងារជូនគណបក្ស ជូនប្រជាជនតាមមូលដ្ឋាននៃសង្កាត់ទាំង២ ឳ្យបានគ្រប់ជ្រុងជ្រោយ និងទាន់ពេលវេលា ។
ឯកឧត្តមវេជ្ជបណ្ឌិត កែវ វណ្ណៈ បន្ថែមថា មានការងារជាច្រើនទៀតដែលមន្ត្រីគណបក្សត្រូវបន្តចុះសិក្សា ដោះស្រាយជូនប្រជាពលរដ្ឋ នៅតាមមូលដ្ឋាន ពិសេសប្រជាពលរដ្ឋងាយរងគ្រោះ ព្រោះថារាជរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា ដែលមានសម្តេចធិបតី ហ៊ុន ម៉ាណែត ជាប្រមុខបានគិតគូរយ៉ាងខ្លាំងពីសុខទុក្ខរបស់ប្រជាពលរដ្ឋគ្រប់ស្រទាប់វណ្ណៈក្នុងនោះសម្តេចបានលើកទឹកចិត្ត និងផ្តល់ឳកាស ដល់យុវជនដែលបាត់បងឳកាសសិក្សារៀនសូត្របានសិក្សាជំនាញវិជ្ជាជិវៈ ដោយឥតគិតថ្លៃ និងទទួលបានប្រាក់ឧបត្ថមថែមទៀតផង ។ ក្នុងនោះការគាំពារសុខភាពជូនប្រជាពលរដ្ឋ ក៏ជាផែនការអទិភាពយ៉ាងសំខាន់ផងដែរ ។
