នៅថ្ងៃទី១៥ ខែកក្កដា ឆ្នាំ២០២៤ គណៈប្រតិភូ នៃព្រះរាជាណាចក្រថៃ ដឹកនាំ ដោយ លោកស្រីសាស្ត្រាចារ្យ ថាត់សៈនីយ៉ា និរិត ប្រធានក្រុមផលិតផលវាយនភណ្ឌ និងជាប្រធានមជ្ឈមណ្ឌលស្រាវជ្រាវ អភិវឌ្ឍសូត្ររាជមង្គលឦសាន្ត ជាប្រធានប្រតិភូ បានដឹកនាំសហការី ចំនួន ៥រូប ទៀតចុះតាមដានលទ្ធផលការបណ្តុះបណ្តាលការអភិវឌ្ឍ ផលិតផល OVOP នៃក្រុមផលិតផលទាំង ៦ ប្រភេទ នៅខេត្តកំពង់ចាម ។
តាមការគូសបញ្ជាក់ របស់ លោកសាស្ត្រាចារ្យ ថាត់សៈនីយ៉ា និរិតប្រធានប្រតិភូ ឲ្យដឹងថា គណៈប្រតិភូ របស់លោកស្រី មកកាន់ខេត្តកំពង់ចាម នៃព្រះរាជាណាចក្រកម្ពុជា មានគោលបំណង ៖ ១.ដើម្បី ប្រមូលទិន្នន័យ ថាអ្នកចូលបណ្តុះបណ្តាល ដែលទទួលបានការបណ្តុះបណ្តាលការអភិវឌ្ឍផលិតផល OVOP នៃក្រុមផលិតផលទាំង ៦ ប្រភេទ កាលពី ខែសីហា ឆ្នាំ២០២៣ នៅសាកលវិទ្យាល័យបច្ចេកវិទ្យារាជមង្គលឦសាន សាខាខេត្តសុរិន្ទ ខេត្តសុរិន្ទ ព្រះរាជាណាចក្រថៃ អាចនាំចំណេះ និងជំនាញ មកប្រើជាប្រយោជន៍បានតិចច្រើន ។ ២.ត្រួតពិនិត្យទីតាំង នៅខេត្តកំពង់ចាម (ទីតាំងរបស់គម្រោង) ដើម្បី ជាទិន្នន័យក្នុងការរៀបចំផែនការ បង្កើតកម្មវិធី និងកំណត់គោលការណ៍ សម្រាប់ការដំណើរការគម្រោង ឲ្យសមស្រប និងស្រប តាមស្ថានភាពទីតាំង ។ និង៣.ពិភាក្សា ជាមួយតំណាងគណៈកម្មាធិការជម្រុញចលនាភូមិមួយផលិតផលមួយ (OVOP) របស់កម្ពុជា (ក្នុងកម្រិតក្រុមការងារ) ដើម្បី ពិភាក្សាពីគោលការណ៍ក្នុងការដំណើរការគម្រោង និងសិក្សា ពិនិត្យការងារក្នុងការដំណើរការគម្រោងភូមិមួយផលិតផលមួយ (OVOP) របស់កម្ពុជា ដើម្បី ជាទិន្នន័យ ក្នុងការរៀបចំគម្រោងសហប្រតិបត្តិការបន្តទៀត ។
ផ្អែកតាមកម្មវិធីគ្រោងទុក នៅរសៀលថ្ងៃទី១៥ ខែកក្កដា នេះ ឯកឧត្ដម ហាន កុសល អភិបាលរងខេត្ត តំណាងដ៏ខ្ពង់ខ្ពស់ ឯកឧត្ដម អ៊ុន ចាន់ដាអភិបាល នៃគណៈអភិបាល ខេត្តកំពង់ចាម និងសហការី ក្រុមការងារលេខាធិការដ្ឋានខេត្ត ភូមិ១ ផលិតផល ១ បានអញ្ជើញទទួលបដិសណ្ឋារកិច្ចស្វាគមន៍ និងអញ្ជើញអមដំណើរ ក្រុមគណៈប្រតិភូ តាមរថយន្ត ចុះទៅកាន់សហគមន៍ សំបូរមានជ័យ ស្ថិតនៅភូមិសំបូរ ឃុំសូភាស ស្រុកស្ទឹងត្រង់ និងសហគ្រាសផលិតគ្រប់ស្វាយចន្ទី ឡឹង ម៉ានុត ស្ថិតនៅភូមិតាអុង ឃុំតាអុងស្រុកចំការលើ ដើម្បី តាមដានលទ្ធផលការបណ្ដុះបណ្ដាលការអភិវឌ្ឍផលិតផលភូមិមួយ ផលិតផលមួយ ជាមួយអ្នកចូលរួមបណ្ដុះបណ្ដាល ក្នុងក្រុមអាហារ និងភេសជ្ជៈ នៅព្រះរាជាណាចក្រថៃ កាលពីឆ្នាំកន្លងទៅនោះ ។
សូមជម្រាបថា នាឱកាសអញ្ជើញដល់ សហគមន៍ និងសហគ្រាសទាំង ២ទីកន្លែង ខាងលើ ឯកឧត្ដម អភិបាលរងខេត្ត និងក្រុមការងារគណៈប្រតិភូ ក៏បានលើកឡើងនូវចម្ងល់ រួមទាំង ការស្ដាប់នូវវឌ្ឍនភាព និងការលើកឡើង នូវបញ្ហាប្រឈមនានា របស់ម្ចាស់សហគមន៍ និងម្ចាស់សិប្បកម្ម ផងដែរ ៕
