រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអះអាងថា មានសមត្ថកិច្ចខ្លះបានបោះបង់ចំពោះការរាយការណ៍ពីប្រជាពលរដ្ឋពាក់ព័ន្ធនឹងបញ្ហាគ្រឿងញៀនដែលកើតមានឡើងនៅក្នុងមូលដ្ឋាន ។
ថ្លែងក្នុងពិធីបិទសន្និបាតបូកសរុបលទ្ធផលការងារត្រួតពិនិត្យគ្រឿងញៀនឆ្នាំ២០១៩ និងលើកទិសដៅការងារឆ្នាំ២០២០ របស់អាជ្ញាធរជាតិប្រយុទ្ធប្រឆាំងគ្រឿងញៀន និងកិច្ចប្រជុំបូកសរុបលទ្ធផល នៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៤ ឆ្នាំ២០១៩ នារសៀលថ្ងៃទី១៧ខែមីនា ឆ្នាំ២០២០ នៅទីស្ដីការក្រសួងមហាផ្ទៃ សម្តេចក្រឡាហោម ស ខេង បានគូសបញ្ជាក់ថា “ខ្ញុំដឹងមានសមត្ថ កិច្ចខ្លះបានបោះបង់ការរាយការណ៍ពីប្រជាពលរដ្ឋពាក់ព័ន្ធនឹងគ្រឿងញៀន បញ្ហានេះមានរឿងពាក់ព័ន្ធច្រើន តែខ្ញុំមិនទាន់ដឹងរឿងនេះទេ ប៉ុន្តែត្រូវធ្វើការសហការគ្នា”។ សម្ដេចក្រឡាហោមបានស្នើដល់គ្រប់អង្គភាពទាំងអស់ត្រូវរួមគ្នាទប់ស្កាត់ ការបង្ក្រាបបទ ល្មើសគ្រឿងញៀនទាំងអស់ដើម្បីធ្វើការយ៉ាងណាកុំឱ្យមានការចរាចរឆ្លងកាត់ ឬចែកចាយនៅក្នុងប្រទេសកម្ពុជា។ឯកឧត្ដម នាយឧត្តមសេនីយ៍ កែ គឹមយ៉ាង ឧបនាយករដ្ឋមន្ដ្រី ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀនបានលើកឡើងថា អាជ្ញាធរជាតិគ្រឿងញៀន មានគោលការណ៍ចង់ព្យាបាលអ្នកញៀនថ្នាំ នៅមណ្ឌលសុខភាពតាមឃុំ-សង្កាត់ ដើម្បីងាយស្រួលដល់អាជ្ញាធរមូលដ្ឋាន ក្នុងការគ្រប់គ្រងពួកគាត់។ ឯកឧត្ដម ឧបនាយករដ្ឋមន្រ្ដីបានកត់សម្គាល់ឃើញថា ថ្នាក់ជាតិ និងថ្នាក់ខេត្ត មានការមកព្យាបាលយ៉ាងច្រើនពីអ្នកប៉ះពាល់គ្រឿងញៀន រហូតទៅដល់៤៣ភាគរយ ទៅ៤៤ភាគរយ ខណៈការព្យាបាលនៅមណ្ឌលសុខភាព តាម ឃុំ-សង្កាត់ មានត្រឹមតែ ១៥ភាគរយប៉ុណ្ណោះ។ ឯកឧត្ដម ឧបនាយករដ្ឋមន្រ្ដីបានថ្លែងថា “គោលការណ៍របស់យើង ចង់ព្យាបាលនៅជិតផ្ទះសម្ដែង ហើយប្រគល់ឱ្យ ឃុំ-សង្កាត់ ជាប់នៅជាមួយមណ្ឌលសុខភាពនោះ ដើម្បីគ្រប់គ្រងអ្នកញៀនថ្នាំ។ ដល់ធ្វើនៅថ្នាក់ខេត្ត ឃុំ-សង្កាត់ អត់ដឹងផង មិនដឹងព្យាបាលនៅឯណា មិនមែនដូចជំងឺអេជស៍ ដើររកថ្នាំ។ ចំពោះអ្នកញៀនថ្នាំ ដើរគេចពីប៉ូលីស ដល់មែនទែនទៅ ដើរគេចពីប៉ូលីសមូលដ្ឋាន ឃុំ-សង្កាត់ រួចគេចមកខេត្ត។ បញ្ហានេះធ្វើយ៉ាងម៉េចពង្រឹងប្រព័ន្ធ មណ្ឌលសុខភាពឱ្យជាកន្លែងផ្ញើប្រាណអ្នកញៀន។”ឯកឧត្ដម ឧបនាយករដ្ឋមន្រ្ដី កែ គឹមយ៉ាង បានបន្ថែមថា កម្ពុជានៅតែជាប្រទេសរងគ្រោះចំពោះបញ្ហាចរាចរណ៍គ្រឿងញៀនឆ្លងកាត់ ដែលពួកឧក្រិដ្ឋជនឆ្លងកាត់តាមរយៈ ព្រំដែន ប្រៃសណីយ៍ ផ្លូវអាកាស ជាដើម ដែលបញ្ហាទាំងនេះធ្វើឱ្យប៉ះពាល់ទៅដល់យុវជនកម្ពុជា ផងដែរ ។
ឯកឧត្ដម ឧបនាយករដ្ឋមន្រ្ដីបានថ្លែងទៀតថា ការចរាចរណ៍ឆ្លងកាត់ទិសភាគឦសាន នៅតែជាប្រភពនាំចូលគ្រឿងញៀនមកក្នុងប្រទេសរបស់យើង ហើយកញ្ចប់ប្រៃសណីយ៍ ក៏ជាមធ្យាបាយ ដែលពួកឧក្រិដ្ឋជនបានប្រើប្រាស់ និងក៏បានប្រើប្រាស់តាមផ្លូវអាកាសផងដែរ។ ឯកឧត្ដម ឧបនាយករដ្ឋមន្រ្ដីបានថ្លែងបញ្ជាក់ថា “ការនាំចេញ ក៏ជាគោលដៅមួយ ដែលពួកឧក្រិដ្ឋជនយកទឹកដីរបស់យើង ដើម្បីប្រើប្រាស់ ក្នុងការនាំចេញគ្រឿងញៀនទៅកាន់ប្រទេសទី៣ ដែលធ្វើឱ្យមានការប៉ះពាល់យ៉ាងធ្ងន់ធ្ងរដល់យុវជនយើង ក្នុងប្រទេសថែមទៀត” ៕
