(ត្បូងឃ្មុំ)៖ ឯកឧត្តមឧបនាយករដ្ឋមន្ត្រី ជា សុផារ៉ា បានអំពាវដល់ប្រជាពលរដ្ឋក្នុងស្រុកក្រូចឆ្មារ ខេត្តត្បូងឃ្មុំ សូមជួយថែរក្សា ទំនប់ ប្រឡាយ ពិសេសមិនត្រូវលក់ដីដាច់ខាត ពីព្រោះការលក់ដីគឺយើងទទួលបានប្រាក់ត្រឹមមួយពេល តែបើយើងទុកជួល និងបង្កបង្កើនផល គឺយើងទទួលបានប្រាក់ចំណូលមួយជីវិត។
ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ ថ្លែងបែបនេះ ក្នុងឳកាស ដឹកនាំមន្ត្រីជំនាញចុះពិនិត្យ បឹង ប្រឡាយ និងទំនប់ទឹកមួយចំនួន ក្នុងឃុំចំនួន០៤ ស្រុកក្រូចឆ្មារ ខេត្តត្បូងឃ្មុំ ដើម្បីសិក្សាធ្វើយ៉ាងណារក្សា និងទាញយកប្រភពទឹកសម្រាប់ស្រោចស្រពដំណាំផ្សេងៗរបស់ប្រជាកសិករ នារដូវប្រាំង ដូចជាស្រូវ ពោត និងថ្នាំជក់ជាដើម ខណៈឆ្នាំនេះ បឹង និងប្រឡាយនានាបានគោករាក់ ធ្វើឲ្យប្រជាពលរដ្ឋមួយចំនួនបង្ខំចិត្តបុកអណ្តូងស្នប់ ដើម្បីទាញយកទឹកមកប្រើប្រាស់ ។
រួមដំណើរនាឳកាសនោះពីសំណាក់ប្រតិភូក្រសួងរៀបចំដែនដី ឯកឧត្តមបណ្ឌិត ជាម ច័ន្ទសោភ័ណ អភិបាលខេត្ត រួមទាំងថ្នាក់ដឹកនាំខេត្ត មន្ទីរ អង្គភាពជុំវិញខេត្ត និងអាជ្ញាធរស្រុកក្រូចឆ្មារ។
ជាមួយនឹងការចុះពិនិត្យនោះ ឯកឧត្តមឧបនាយករដ្ឋមន្ត្រី បានមានប្រសាសន៍ទៅកាន់បងប្អូនប្រជាពលរដ្ឋ ពិសេសអាជ្ញាធរ ភូមិ/ឃុំ សិក្សាឲ្យបានច្បាស់ថាត្រូវជីកប្រឡាយ ធ្វើទំនប់ បែបណាដើម្បីរក្សាទឹកបានច្រើនអាចប្រើប្រាស់គ្រប់គ្រាន់ តាមតំបន់នីមួយៗ ខណៈក្រុមការងារត្រៀមជានិច្ច ក្នុងការជួយតាមសំណូមពរ ។
ឆ្លៀតក្នុងឳកាសនោះ ឯកឧត្តមឧបនាយករដ្ឋមន្ត្រី ក៍បានដោះស្រាយបញ្ហាដីនៅតំបន់ជាប់បឹង ជូនប្រជាពលរដ្ឋ
ដោយប្រើប្រាស់យុទ្ធសាស្ត្រឈ្នះៗបានយ៉ាងល្អ និងបានលើកទឹកចិត្តជួយសម្រួលប្រជាពលរដ្ឋ ធានាជួយទិញគោ ដែលពលរដ្ឋចិញ្ចឹមបានផងដែរ។
សូមជម្រាបថា៖ ក្រោមការចង្អុលបង្ហាញពីសំណាក់ឯកឧត្តម ឧបនាយករដ្ឋមន្ត្រី ជា សុផារ៉ា បានចាត់ឲ្យក្រុមការងារចុះជួយអន្តរាគមន៍ស្តារប្រឡាយមួយចំនួន ដូចជាប្រឡាយវត្តគគីរ និងប្រឡាយទួលតាចក់, ដាក់ម៉ាស៊ីនបូមទឹកចំនួន២ ជួយបូមទឹកពីព្រែកចាមចូលប្រឡាយប្រវែង៤គីឡូម៉ែត្រ បម្រើប្រយោជន៍កសិករ៦ភូមិ លើផ្ទៃដីជាង២០០ហិកតា ។
គ្រោងជីកស្រះធំមួយនៅឃុំស្វាយឃ្លាំង បម្រើការស្រោចស្រពលើផ្ទៃដីច្រើនជាង ៣០០ ហិកតា ។ អន្តរាគមន៍ស្តារប្រឡាយអូឈ្លើង យកទឹកពីបឹងធំ ក្នុងឃុំរការខ្នុរ សម្រាប់ស្រោចស្រពដំណាំថ្នាំជក់ ពោត ប្រជាពលរដ្ឋចំនួន៥ភូមិ ។
ដោយឡែកនៅឃុំឈូកក្រុមការងារបានទាញយកទឹក សង្រ្គោះស្រូវនៅចំនុចឃ្លីវ និងបឹងកាដេរ តាមរយ:ការស្តាប្រឡាយទាញយកទឹកពីបឹងការដេដែលអាចស្រោចស្រពលើផ្ទៃដីច្រើនជាង ១៥០០ ហិកតា៕
