ស្ត្រីមេម៉ាយទីទ័លក្រ ១ គ្រួសារ នៅស្រុកបាធាយទទួលបានផ្ទះ ១ ខ្នងពីសាខាកាកបាទក្រហមខេត្តកំពង់ចាម

( កំពង់ចាម ):

ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានសាខាកាកបាទក្រហមខេត្ត បានដឹកនាំសហការី រួមជាមួយមេ គណ ខេត្ត អញ្ជើញចុះប្រគល់ផ្ទះមនុស្សធម៌ ១ ខ្នង ជូនស្ត្រីមេម៉ាយទ័លលំបាកម្នាក់ ឈ្មោះ ឆៃ អ៊ូ អាយុ ៤៥ ឆ្នាំ រស់នៅ ភូមិប្រយុគ ឃុំទំនប់ ស្រុកបាធាយ ខេត្តកុះពង់ចាម នាព្រឹកថ្ងៃទី ៤ ខែសីហា ឆ្នាំ ២០២១ នេះ ។

លោក ទូច ឆៃ បន្តថា ស្ត្រីរូបនោះ ក្រៅពីការជួយឧបត្ថម្ភរបស់រាជរដ្ឋាភិបាល តាមរយៈ ប័ណ្ណសមធម៌ក្រ ១ គាត់ត្រូវដើររើសអេតចាយ និងជួយលាងចានឆ្នាំង តាមផ្ទះគេ គ្រាន់បានកម្រៃប្រចាំថ្ងៃ ចិញ្ចឹមកូនតូចៗ ទាំង ២ នាក់ ។
ខណ:ពេលនេះ ឯកឧត្តម អ៊ុន ចាន់ដា ប្រធានគណៈកម្មាធិការសាខា សម្រេចផ្តល់ជូនផ្ទះ ១ ខ្នង សង់ពីឈើខ្ពស់ផុតពីដី ប្រក់ស័ង្កសី ( ទំហំ ៤ ម × ៦ ម ) តម្លៃ ៩.៨០០.០០០ រៀល ជាថវិកាបដិភាគ របស់សាខា សាលាគណ អនុសាខាស្រុកសាលាអនុគណ ចៅអធិការវត្ត និងសប្បុរសជន ជូនស្ត្រី ឆៃ អ៊ូ សម្រាប់ស្នាក់នៅជាកម្មសិទ្ធិ ។

ឯកឧត្តម អ៊ុន ចាន់ដា បានក្រើនរំលឹកដល់អ្នកចូលរួម និងប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នការពារខ្លួនជាប្រចាំ ក្នុងការរួមគ្នាទប់ស្កាត់ការឆ្លងរាតត្បាតនៃជម្ងឺឆ្លងកូវីដ-១៩ ទាំងអស់គ្នា ដោយបុគ្គលម្នាក់ៗ ក៏ដូចជាក្រុមគ្រួសារនីមួយៗ រួមទាំងអ្នកដែលបានចាក់វ៉ាក់សាំងរួចហើយក្តី ចាំបាច់ត្រូវតែយកចិត្តទុកដាក់អនុវត្ត ឲ្យបានខ្ជាប់ខ្ជួន នូវវិធានសុខាភិបាល ” ៣ ការពារ និង ៣ កុំ ” ដើម្បីចៀសឲ្យផុតពីការឆ្លងរាលដាលនៃជម្ងឺដ៏កាចសាហាវនេះ ក្នុងស្ថានភាពដែលវីរុសបំប្លែងថ្មី ប្រភេទ Delta កំពុងវាយលុកយ៉ាងសកម្ម ដែលជាបញ្ហាប្រឈម និងជាក្តីកង្វល់ដ៏ធំ សម្រាប់ព្រះរាជាណាចក្រកម្ពុជាយើង ពិសេសនៅក្នុងគ្រួសារ និង សហគមន៍ ។

ក្នុងនោះក៏មានជាអំណោយបន្ថែមរួមមាន អង្ករ ៥០ គក្រ, ត្រីខ ១០ កំប៉ុង, ទឹកត្រី ៦ ដប ទឹកស៊ីអ៊ីវ ៦ ដប, មី ១ កេស, ឃីត ១ សម្រាប់, អាវយឺត ៨, សម្ភារផ្ទះបាយមួយចំនួន និង ថវិកា ២០០.០០០រៀល ។
ក្នុងនោះផងដែរ ពលរដ្ឋមានជីវភាពខ្វះខាតចំនួន ១២ គ្រួសារទៀត ដែលបានចូលរួមនាពេលនោះ ក៏ទទួលបានអំណោយមនុស្សធម៌ ក្នុង ១ គ្រួសារ មាន អង្ករ ត្រីខ ឃីត មី ទឹកត្រី ទឹកស៊ីអ៊ីវ និង អាវយឺត ព្រមទាំង ថវិកាចំនួន ២០.០០០ រៀល ផងដែរ ៕