ត្បូងឃ្មុំ)៖ នៅព្រឹកថ្ងៃទី០៨ ខែតុលា ឆ្នាំ២០២២នេះ លោកបណ្ឌិត ជាម ច័ន្ទសោភ័ណ អភិបាលខេត្ត និងជាប្រធានគណៈកម្មាធិការសាខាកាកបាទក្រហមខេត្តត្បូងឃ្មុំ និងលោកស្រី ម៉េង វ៉ាន់ដានីន បានដឹកនាំអភិបាលរងខេត្ត សមាជិក សមាជិកា គណៈកម្មាធិការសាខា អនុសាខា ក្រុមប្រតិបត្តិសាខា និងអ្នកស្ម័គ្រចិត្ត អញ្ជើញចុះសួរសុខទុក្ខ នាំយកអំណោយកាកបាទក្រហមខេត្ត ទៅផ្តល់ជូនដល់គ្រួសារប្រជាពលរដ្ឋរងគ្រោះដោយទឹកជំនន់ជម្លៀសមកពីឃុំជីរោជ៍ទី១ មាន៤២គ្រួសារ និងឃុំទន្លេបិទ៩០គ្រួសារ សរុបចំនួន១៣២គ្រួសារ។
ក្នុងឱកាសនោះ លោកបណ្ឌិត ជាម ច័ន្ទសោភ័ណ បាននាំនូវការផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនប្រជាពលរដ្ឋទាំងអស់ផងដែរ។ លោកបណ្ឌិត បានណែនាំឲ្យអាជ្ញាធរសហការជាមួយមន្ទីរសុខាភិបាលខេត្ត និងមន្ទីរអភិវឌ្ឍន៍ជនបទខេត្ត រៀបចំការរស់នៅរបស់ពលរដ្ឋឲ្យបានល្អ មានបង្គន់អនាម័យ ក្រុមគ្រូពេទ្យ ថ្នាំសង្កូវនិងភ្លើងបំភ្លឺនាពេលយប់ជាដើម។
បន្ថែមពីនេះលោកអភិបាលខេត្ត ក៏បានក្រើនរំលឹក និងអំពាវនាវឲ្យប្រជាពលរដ្ឋទាំងអស់ថែរក្សាសុខភាព ពិសេសអ្នករស់នៅតាមដងទន្លេ បង្កើនការប្រុងប្រយ័ត្នឲ្យបានខ្ពស់។
លោកបានផ្ដល់អនុសាសន៍ថា រដ្ឋបាលខេត្ត និងរដ្ឋបាលក្រុងស្រុកទាំង៧ ដែលចំណុះឲ្យរដ្ឋបាលខេត្តត្បូងឃ្មុំ និងលោកមេឃុំចៅសង្កាត់ទាំងអស់ បានខិតខំប្រឹងប្រែងណាស់ ក្នុងការសហការជាមួយអាជ្ញាធរមូលដានភូមិឃុំ ពង្រឹងបង្ក្រាបនូវល្បែងសុីសងគ្រប់ប្រភេទទាំងអស់ ដែលកើតមាននៅក្នុងមូលដ្ឋានរបស់ខ្លួន តាមបទបញ្ជារបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។
លោកបណ្ឌិត ជាម ច័ន្ទសោភ័ណ បានផ្ដាំផ្ញើដល់ប្រជាពលរដ្ឋទាំងអស់ថា បើសិនឃើញមានល្បែងស៊ីសង ឬមានការប្រើប្រាស់នូវគ្រឿងញៀន សូមជួយរាយការណ៍មកដល់លោកមេភូមិ ហើយលោកមេភូមិ រាយការណ៍មកលោកមេឃុំចៅសង្កាត់ លោមេឃុំចៅសង្កាត់រាយការណ៍ ទៅលោកអភិបាលស្រុក ហើយលោកអភិបាលស្រុក រាយការណ៍ទៅ អភិបាលខេត្ត ដើម្បីចាត់វិធានការឲ្យកម្លាំងចុះមកបង្ក្រាបឲ្យបានទាន់ពេលវេលា។
លោកបន្តថា ប្រសិនបើមូលដ្ឋានណាកើតមានឡើងនៅល្បែងសុីសង់ អាជ្ញាធរមូលដ្ឋាននោះត្រូវទទួលខុសត្រូវ ទាំងមេភូមិ ទាំងមេឃុំ ក៏ដូចគ្នាជាមួយនឹងប៉ុស្តិ៍នគរបាល និងអធិកា មេបញ្ជាការកងរាជអាវុធហត្ថ ឬក៏អភិបាលស្រុកក្រុងទាំងអស់ ដាច់ខាតភូមិទាំងអស់៨៧៣ភូមិ ដែលចំណុះឲ្យរដ្ឋបាលខេត្តត្បូងឃ្មុំ ត្រូវតែជាភូមិ «ស» ជាភូមិ ផា សុខភាព គឺជាភូមិដែលអាចរស់នៅដោយសុខសាន្ត មិនមានការរស់នៅដោយភិតភ័យបញ្ហាចោរកម្មលួចឆក់ប្លន់នោះទេ។
លោកបណ្ឌិត ជាម ច័ន្ទសោភ័ណ បានបន្ថែមទៀតថា បើបុគ្គលណាដែលមានពាក់ព័ន្ធ ត្រូវតែមានទោសទាន់ មិនឲ្យរួចខ្លួនទេ ជាការក្រើនរំលឹកទៅដល់អាជ្ញាធរនៅមូលដ្ឋានរបស់យើង កងកម្លាំងរបស់យើងនៅតាមមូលដ្ឋាន អ្នកដែលប៉ះពាល់ត្រូវតែមានទោសទាន់ដកចេញពីមន្ត្រីរាជការ ដកចេញពីកងកម្លាំង ហើយត្រូវមានទោសទាន់ថែមទៀត។
ចំពោះអំណោយមនុស្សធម៌ដែលបានផ្តល់ជូនដល់គ្រួសារនីមួយៗ រួមមាន អង្ករ២៥គីឡូក្រាម, មី១កេស, ទឹកត្រី១យួរ, ទឹកស៊ីអុីវ១យួរ, ត្រីខ១០កំប៉ុង និងថវិកាចំនួន២០,០០០រៀល។
ជាមួយគ្នានោះលោកបណ្ឌិត ជាម ច័ន្ទសោភ័ណ និងលោកស្រី បានបន្តសំណេះសំណាល និប្រគល់ជូនអំណោយ និងចែកថវិកាលើកទឹកចិត្តដល់កងកម្លាំង ប្រជាការពារ ក៏ដូចជាចែកនំចំណី ដល់កុមារាកុមារី ដោយក្តីស្រលាញ់ចេញពីបេះដូងយ៉ាងកក់ក្តៅផងដែរ។
សូមជម្រាបថា ទឹកទន្លេមេគង្គថ្ងៃនេះមានកម្ពស់ ១៣,៤៣ម៉ែត្រ ធៀបព្រឹកថ្ងៃម្សិលមិញ ទឹកស្រក០,១៥ម៉ែត្រ ធៀបនឹងឆ្នាំមុនខ្ពស់ជាង ៤,៤០ម៉ែត្រ កំពស់ទឹកប្រកាសអាសន្ន ១៥,២០ម៉ែត្រ៕
