ត្បូងឃ្មុំ) ៖ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណអភិបាលខេត្តត្បូងឃ្មុំ បាននអញ្ជើញជាអធិបតីក្នុងពិធី បិទ សន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២១–២០២២ និងទិសដៅឆ្នាំសិក្សា ២០២២–២០២៣ នារសៀលថ្ងៃទី ២៤ ខែកុម្ភៈឆ្នាំ ២០២៣ នៅសាលប្រជុំ គ សាលាខេត្តត្បូងឃ្មុំ ។ ដោយមានការអញ្ជើញចូលរួមពីសំណាក់ ឯកឧត្តមអភិបាលរងខេត្ត លោកនាយរដ្ឋបាលសាលាខេត្ត លោក–លោកស្រី ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងទាំងបីប្រភេទ អភិបាល–អភិបាលរងក្រុង–ស្រុក លោកគ្រូ អ្នកគ្រូ មន្ត្រី នៃមន្ទីរអប់រំ យុវជន និងកីឡា ខេត្ត ព្រមទាំងអ្នកពាក់ព័ន្ធជាច្រើនរូប ។
លោក អ៉ិន ពៅសម្បត្តិ ប្រធានមន្ទីរអប់រំ យុវជន និងកីឡា ខេត្ត បានមានប្រសាសន៍ថា សន្និបាតប្រចាំឆ្នាំដែលមមន្ទីរអប់រំធ្វើឡើងនាពេលនេះ ក្នុងគោលបំណងបូកសរុបវាយតម្លៃការងារដែលបានអនុវត្ត ក្នុងឆ្នាំសិក្សា ២០២១–២០២២ និងទិសដៅឆ្នាំសិក្សា២០២២–២០២៣ មានរយៈពេល ០២ ថ្ងៃ គឺថ្ងៃ ២៣–២៤ ខែកុម្ភៈ ឆ្នាំ ២០២៣ ជាលទ្ធផលដែលសម្រេចបានកន្លងមកនេះ បានលើកឡើងបង្ហាញក្នុងកិច្ចពិភាក្សាអង្គសន្និបាតចំនួន ៩ ប្រធានបទ មាន៖១/អក្ខរកម្មជាស្ពានឆ្ពោះទៅរកជំនាញមុខរបរ និងការសិក្សាបន្ត ២/ការចូលរួមរបស់យុវជនក្នុងវិស័យអប់រំ ៣/សុខភាពសិក្សាផ្សារភ្ជាប់ទៅនឹងសុវត្ថិភាពចំណីអាហារ ៤/ការគាំពារ និងការអភិវឌ្ឍកុមារតូចតាមគ្រប់រូបភាព ៥/ការវាយតម្លៃលទ្ធផលសិក្សា និងការជួយសិស្សជាប្រចាំ ៦/ការលើកកម្ពស់ការអប់រំវិទ្យាសាស្ត្រ និងបច្ចេកទេស ឆ្ពោះទៅទីផ្សារការងារសម័យឌីជីថល ៧/ការងារអប់រំ យុវជន និងកីឡាស្រុកតំបែរ ៨/គម្រោងកុមាររីករាយរបស់អង្គការខេប ៩/បទពិសោធន៍ នាយកសាលារៀនល្អរបស់វិទ្យាល័យហេងសំរិនអន្លង់ជ្រៃ។
មានប្រសាសន៍នាឱកាសនេះ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្ត បានលើកឡើងថា រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ បានយកចិត្តទុកដាក់យ៉ាងខ្លាំងលើវិស័យអប់រំ ដូចវិស័យអាទិភាពមួយផ្សេងទៀត ដោយបានតម្លើងប្រាក់បៀរវត្ស ដល់លោកគ្រូ អ្នកគ្រូ ឱ្យបានសមរម្យ ដើម្បីជួយលើតម្កើងកម្រិតជីវភាពរបស់ពួកគាត់ ឱ្យបានល្អប្រសើរបន្ថែមមួយកម្រិតទៀត ។
ឯកឧត្តមបណ្ឌិតអភិបាលខេត្ត ក៏បានថ្លែងអំណគុណដល់ លោកគ្រូ អ្នកគ្រូ ដែលទុកដូចជាឪពុកម្តាយទី២ ក្នុងការផ្ទេរចំណេះដឹងបទពិសោធន៍ កម្លាំងកាយចិត្ត សីលធម៌ គុណធម៌ ដើម្បីបណ្តុះធនធានមនុស្សពោពេញសមត្ថភាព ចំណេះដឹង និងជំនាញច្បាស់លាស់ ចូលរួមក្នុងការអភិវឌ្ឍន៍ប្រទេសជាតិឲ្យមានការរីកចម្រើន និងមានការអភិវឌ្ឍន៍លើគ្រប់វិស័យ។
ឯកឧត្តមបានបន្ថែមទៀតថា សម្តេចតេជោ ហ៊ុន សែន បានបញ្ចប់សង្រ្គាម និងបង្រួបង្រួមជាតិឡើងវិញបានជោគជ័យ នាំមកនូវសន្តិភាពជូនជាតិ និងប្រជាពលរដ្ឋ ដោយបានដាក់ចេញនូវគោលនយោបាយ ឈ្នះ! ឈ្នះ! នាំឲ្យប្រទេសជាតិមានសុខសន្តិភាពពេញលេញ និងបានធ្វើការកសាងហេដ្ឋារចនាសម្ព័ន្ធនានាជាច្រើន ឲ្យមានការរីកចម្រើន ដោយផ្តើមចេញពីយើងទាំងអស់គ្នា។
ឯកឧត្តមបណ្ឌិត ជាម ច័ន្ទសោភ័ណ បានវាយតម្លៃខ្ពស់ និងកោតសរសើ ចំពោះថ្នាក់ដឹកនាំមន្ទីរអប់រំ យុវជន និងកីឡា និងលោកគ្រូអ្នកគ្រូ ដែលបានខិតខំប្រឹងប្រែងក្នុងការអនុវត្តការងារ ពិសេសក្នុងអំឡុងការឆ្លងរីករាលដាលនៃជំងឺកូវីដ–១៩ នាពេលកន្លងមក។បន្ថែមលើនេះឯកឧត្តមបណ្ឌិតអភិបាលខេត្ត ក៏បានណែនាំដល់បុគ្គលិកអប់រំទាំងអស់ ពិសេសលោកគ្រូ អ្នកគ្រូ និងនាយកសាលានានា ត្រូវពង្រឹងនូវការគ្រប់គ្រងសាលារៀនឱ្យមានវិន័យល្អ ពិសេសលើគ្រូបង្រៀនតែម្តងដើម្បីឲ្យប្រព័ន្ធអប់រំ ក្នុងខេត្តកាន់តែមានភាពរឹងមាំ និងល្អប្រសើបន្ថែមទៀត។
ទន្ទឹមនឹងនេះ ឯកឧត្តមបណ្ឌិត ជាម ច័ន្ទសោភ័ណ ក៏បានប្រគល់នូវសៀវភៅ “កូនប្រុសច្បងដ៏មានឥទ្ធិពល” និងសៀវភៅសម្តេចតេជោ សម្តេចកិត្តិព្រឹទ្ធបណ្ឌិត ប្រគល់ទង់ជ័យលាភី បណ្ណសរសើ ជូនដល់អង្គភាព និងបុគ្គលិកអប់រំ មានស្នាដៃល្អ និងថវិការមួយចំនួនទៀត និងជំរុញឲ្យលោកគ្រូ អ្នកគ្រូ និងក្រុមគ្រួសារ រួមជាមួយប្រជាពលរដ្ឋ សិស្សានុសិស្សទាំងអស់ ដែលគ្រប់អាយុបោះឆ្នោត ត្រូវទៅបោះឆ្នោតជ្រើសតាំងតំណាងរាស្ត្រ នីតិកាលទី៧ នាពេលដ៏ខ្លីខាងមុខឲ្យបានគ្រប់ៗគ្នា ដើម្បីជូនសម្តេចតេជោបន្តធ្វើជានាយករដ្ឋមន្រ្តីដឹកនាំប្រទេសជាតិ រក្សាសុខសន្តិភាព និងការអភិវឌ្ឍថ្មីៗបន្ថែមទៀត និងគាំទ្រ ឯកឧត្តមបណ្ឌិត ហ៊ុន ម៉ាណែត ជាអ្នកបន្តវេនដឹកនាំប្រទេសជាតិនាពេលអនាគត៕
