(ត្បូងឃ្មុំ) នាព្រឹកថ្ងៃទី១៨ ខែ មីនា ឆ្នាំ ២០២៣នេះ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណអភិបាខេត្តត្បូងឃ្មុំ និងលោកជំទាវ ឯកឧត្តម ស៊ាក ឡេង ប្រធានក្រុមប្រឹក្សាខេត្ត អញ្ជើញជាអធិបតីក្នុងពិធីបុណ្យចម្រើនព្រះជន្ម និងស្រោចស្រពសុគន្ធវារីប្រគេនព្រះគ្រូចៅអធិការវត្តរតនមុនីតាប៉ាវ ហៅវត្តពងទឹក ស្ថិតនៅក្នុង ភូមិពងទឹក ឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ
ថ្លែងក្នុងឱកាសនេះឯកឧត្តមបណ្ឌិត ជាម ច័ន្ទសោភ័ណ
អភិបាលនៃគណអភិបាខេត្តត្បូងឃ្មុំ បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងពីរតែងតែមានមនោសញ្ចេតនាស្រឡាញ់រាប់អាន និងរួមសុខរួមទុក្ខជាមួយបងប្អូនជនរួមជាតិទាំងអស់ និងជួយដោះស្រាយទុក្ខលំបាកសព្វបែបយ៉ាងគ្រប់ទីកន្លែងទូទាំងប្រទេសកម្ពុជា សមិទ្ធផលទាំងនេះបានបញ្ជាក់ឱ្យឃើញកាន់តែច្បាស់ពីមនោសញ្ចេតនា សាមគ្គីភាព ឯកភាពគ្នាជាធ្លុងមួយ ដែលយើងទាំងអស់គ្នាបានខិតខំកសាងទុកជាទីគោរពសក្ការៈដើម្បីបានជ្រកក្រោមម្លប់ព្រះពុទ្ធសាសនា ដែលជាសាសនារបស់រដ្ឋ ក្រោមដំបូលរដ្ឋធម្មនុញ្ញតែមួយ ។
ឯកឧត្តមបានបន្តទៀតថានៅក្នុងស្រុកត្បូងឃ្មុំ សព្វថ្ងៃមានការរីកចម្រើនលើគ្រប់វិស័យគួរឱ្យកត់សម្គាល់ ជាក់ស្តែង លើវិស័យធម្មការ និងសាសនា ដែលយើងកំពុងប្រារព្ធពិធីនាពេលនេះ ហើយគ្រប់ទីវត្តអារាមសុទ្ធតែបានសាងនូវសមិទ្ធផលជាច្រើនសម្រាប់បម្រើដល់វិស័យពុទ្ធចក្រផងដែរ។ ដោយឡែកចំពោះវត្តមុនីតាប៉ាវ ហៅវត្តពងទឹក ក្រោមគំនិតផ្តួចផ្តើមរបស់ព្រះគ្រូចៅអធិការវត្តនិងមានការឧបត្ថម្ភគាំទ្រដោយ ឯកឧត្ដម លោកជំទាវ លោក លោកស្រី ព្រមទាំងពុទ្ធបរិស័ទគ្រប់ទិសទី និងសប្បុរសជនជិតឆ្ងាយទាំងក្នុងប្រទេស និងក្រៅប្រទេស បានខិតខំពុះពារកសាងឡើង ដើម្បីជាគុណប្រយោជន៍ក្នុងការលើកស្ទួយវិស័យព្រះពុទ្ធសាសនាក្នុងឱកាសនោះឯកឧត្តមបណ្ឌិត បានឧបត្ថម្ភស៊ីម៉ងត៍ចំនួន ២០ តោនដើម្បីចូលរួមកសាងសមិទ្ធិផលនានានៅក្នុងទីអារាមនេះផងដែរ។
